2022 йил январь—май ҳолатига кўра Ўзбекистонда янги ташкил этилган IT компаниялари сони 964 та бўлди. Бу ҳақда Давлат статистика қўмитасидан маълум бўлди.
Ўтган йилнинг дастлабки 5 ойида 945 та IT компания ташкил қилинган эди.
Айни пайтда Ўзбекистонда 8 мингдан ортиқ IT компаниялар фаолият олиб боради.
Йил бошидан бери хорижий капитал иштирокида 120 нафар IT компания ташкил қилинди. Бу кўрсаткич ўтган йилнинг шу давридаги 41 донадан қарийб 3 баробар кўпдир.
2022 йилнинг илк беш ойида хорижий IT компанияларнинг умумий сондаги улуши 12,4 фоиз бўлди. Ўтган йили бу кўрсаткич атиги 4,3 фоиз бўлган эди.
Бунга нима сабаб бўлмоқда?
Бундай ўсиш Украинада уруш бошланиши билан кўплаб Россия ва Беларусь IT-компанияларининг бошқа давлатларга, жумладан, Ўзбекистонга кўчиб ўтишга қарор қилгани билан изоҳланади.
Бундан ташқари, 1 апрелдан бошлаб Ўзбекистонда TashRush дастури ишга тушган, унинг доирасида IT Park ходимлари хорижий IT-компанияларга ўз бизнесларини Ўзбекистонга кўчиришда ёрдам бермоқда.
Ўзбекистонга кўчиб келган IT компаниялари орасида қуйидагилар бор:
- Ravenage Games — компьютер ўйинлари нашриёти. Компания молиялаштириш билан ҳам шуғулланади ва ўтган йили 20 млн долларлик фонд ташкил қилди.
- Outer Space — Made on Earth Games ўйинларини ишлаб чиқариш студияси. Компания ҳозир 4Х мобил стратегиясини устида ишламоқда.
- Fusionlabs — лойиҳа менежерлари ва дастурчиларни тайёрлайдиган ProductStar компанияси.
- ForCode — Diglex (матндан маълумот олиш воситаси) ва Robert Robot (техник ёрдам хизматлари учун сунъий интеллект) ишлаб чиқарувчиси.
- TopFactor — компания ходимларнинг иш фаолиятини бошқаришнинг автоматлаштирилган тизимларини жорий этиш билан шуғулланади.
- Okay QA — дастурий таъминотни синовдан ўтказиш ва сифат назорати компанияси.
TashRush ўзи қандай дастур?
TashRush дастури чет эл IT компанияларини жалб қилиш учун ишлаб чиқилган ва Tashkent Rush, яъни «Тошкент васвасаси» деган қиёсий ном танланган.
Бу ўз вақтида Калифорнияда юз берган «Олтин васвасаси»ни эслатади. Ўша вақтда Калифорнияда олтин кони топилгани ҳақида шов-шув тарқалиб, ҳамма у ерга ошиқа бошлаган бўлса, ҳозир Тошкент кўплаб IT-мутахассислар талпинадиган маконга айланди.
Дастурнинг асосий мақсади — хорижий компаниялар ўз жамоасини Ўзбекистонга релокация қилишида кўмаклашишдир. Ушбу лойиҳа бир неча бепул ёрдамларни ўз ичига олади. Хусусан, мутахассисларни аэропортда кутиб олиб, ҳамёнбоп турар жой топишигача ёрдам бериш ҳам унинг ичига киритилган.
Изоҳ (0)