Марсело: Мадридни бошимни кўтарган ҳолда тарк этяпман

Марсело «Реал» билан хайрлашди.

Клубга, йиллар давомида бирга ўйнашдан завқланган жамоадошларимга, мураббийларга, мен учун оиламдек бўлиб қолган ходимларга, қўриқчиларга миннатдорчилик билдираман.

Ўзимизни фақат футбол ўйнашга бағишлаймиз, лекин шуни таъкидламоқчиманки, биз ўйнай олишимиз ортида кўплаб одамлар турибди ва бу ҳақида «Реал Мадрид»да билиб олдим.

Буларнинг барчаси учун «Мадрид»га раҳмат демоқчиман. Ҳар бир кунимда дунёнинг энг яхши жамоасида ўйнаётганим учун қувонч билан уйғонаман. Фарзандларим дунёнинг энг кучли клубида ўйнай олганимни кўрди.

«Реал» билан шартнома имзолаганимда чўққига чиқа оламан деб ўйлагандим ва ҳозир жамоа тарихидаги энг кўп соврин қўлга киритган футболчиман. Раулни алоҳида таъкидлаб ўтмоқчиман. Ўғлим туғилганда сардор сифатида менга кўп нарса ўргатганди.

Бизга кўп нарсалар берган, буни унутмаймиз. Ўша лаҳзадан бошлаб ундан ўрнак олиб, унинг ортидан боришни мақсад қилдим. Бугун мен унга ўрнак бўлганини айтиш имкониятидан фойдаланган ҳолда бу ерни тарк этяпман.

Мадридни бошимни кўтарган ҳолда тарк этяпман. Оилам мен билан жуда фахрланади. Мен бахтли инсонман, ишимда ҳам, атрофимдаги инсонлар билан ҳам омадим чопган. Барчангизга раҳмат. Бу хайрлашув эмас, мен ўзимни Мадридни тарк этаётгандек ҳис қилмаяпман. Менга чипта бермасангиз муаммолар пайдо бўлиши мумкин.

«Мадрид»нинг келажаги хавфсиз деганимда, ҳар доимгидек у жуда истиқболли эканлигини назарда тутдим. Шу ўринда академияда шуғулланаётган ўғлим ҳақида ҳам гапиряпман. Бу ерга йигитча сифатида келгандим, улғайган эркак бўлиб тарк этяпман.

Марсело, «Реал» футболчиси

Марсело «Реал»даги фаолияти давомида 6 марта Испания чемпионлиги, 2 марта Испания Кубоги, 5 марта Испания Суперкубоги, 5 марта Чемпионлар Лигаси, 3 марта УЕФА Суперкубоги, шунингдек, 4 марта Клублар ўртасидаги Жаҳон чемпионатида ғалаба қозонган.