Россия Украинага қарши урушнинг дастлабки 100 кунида қазиб олинадиган ёқилғини бутун дунё мамлакатларига сотиш орқали 96,6 млрд доллар даромад қилди. Бу ҳақда Sky News хабар бермоқда.
Май ойида халқаро ҳамжамият Москванинг нефть ва газга қарамлигини камайтиришга ҳаракат қилгани учун экспорт ҳажми сезиларли даражада пасайган эди. Бироқ даромад миқдори ҳайратланарли даражада кўпайиб кетди.
Энергия ва тоза ҳаво тадқиқот маркази (CREA) ҳисоботига кўра, Европа Иттифоқи Россияда қазиб олинадиган ёқилғи экспортининг 61 фоизини сотиб олган.
Россия нефти чегирма билан сотилаётган бўлса ҳам, қазиб олинадиган ёқилғига глобал талабнинг ортиши ва энергия нархларининг ўсиши Россия учун фойда бўлиб хизмат қиляпти. Бу даражадаги катта маблағ Украинадаги урушни молиялаштиришга ёрдам бериши мумкин.
CREA етакчи таҳлилчиси Лаури Милливирта Москвага қарши жорий халқаро санкциялар ҳақида шундай деди:
Украинанинг шошилинч ёрдамга муҳтожлигини инобатга олган ҳолда, ҳозирги кунда амалга оширилаётган ишлар жуда ҳам секин бўляпти. Россияга нақд пул оқимини тўхтатиш учун анча кучлироқ чоралар кўриш керак.
Европа Иттифоқи йил охиригача Россияда нефть импортини блокировка қилишга ваъда берди. Бироқ ташкилотга аъзо давлатлар Россия газига қарамлигини қандай ва қачон тугатиш борасида келиша олмаяпти.
Шунга қарамай, Польша, Америка, Литва, Финляндия ва Эстония каби мамлакатлар нефть импортини кескин қисқартириш орқали Россия даромадига катта таъсир кўрсатди.
CREA тадқиқотига кўра, Ҳиндистон, Франция, Хитой, Бирлашган Араб Амирликлари ва Саудия Арабистони импортни кўпайтирди.
Ҳиндистон Россиянинг хом нефть экспортининг 18 фоизини сотиб олди ва Франция қисқа муддатли арзонлаштирилган суюқ табиий газ ва нефть юкларининг энг йирик харидори бўлди.
Россия нефтини янги бозорларга экспорт қилиш Греция ва бошқа Европа юк ташиш компаниялари томонидан амалга оширилмоқда, — дейди Милливирта.
Ҳиндистон ва Яқин Шарққа Россия нефтини олиб кетаётган танкерларнинг 80 фоизи Европа ёки АҚШга тегишли. Агар улар танкерларнинг фаолиятини тўхтаца, даромад кескин камайиши мумкин.
Бу Европа Иттифоқи ҳаракатларининг навбатдаги йўналиши бўлиши керак — дейди таҳлилчи
Атроф-муҳит ва ҳаво ифлосланиши масалаларига эътибор қаратадиган CREA ўз тадқиқотини юк кемалари, юк ташиш маълумотлари, газ қувурлари оқимларини кузатиш ва ўз нархлаш моделлари ёрдамида импорт қийматини баҳолаш орқали амалга оширган.
Аввалроқ Россиянинг Европага нефть экспорти урушгача бўлган даврдагидан ҳам ошиб кетгани ҳақида хабар берилган эди.
Изоҳ (0)