Исроил ташқи ишлар вазири Яир Лапид душанба куни Туркиядаги Исроил фуқароларини эронлик махсус хизмат ходимлари Истанбулда исроилликларга қарши ҳужумларни фаол режалаштираётгани таҳдиди туфайли «имкон қадар тезроқ» Туркияни тарк этишга чақирди.
«Бу ҳақиқий ва бевосита хавф» — деди Лапид ўзининг «Еш Атид» партияси депутатлари йиғилишида. У «Эроннинг Истанбулда дам олаётган исроилликларга қарши террор ҳужумларини амалга оширишга бир неча бор уринишларига» таяниб шундай фикр билдирган.
«Агар сиз аллақачон Истанбулда бўлсангиз, тезроқ Исроилга қайтинг», дейди Лапид. «Агар сиз Истанбулга учишни режалаштирган бўлсангиз — бекор қилинг. Ҳеч бир саёҳат сизнинг ҳаётингизга арзимайди», — дея қўшимча қилган у.
Шунингдек Ташқи ишлар вазири «Туркияга умуман учманг», деб маслаҳат берган.
Эрон ва Исроил ашаддий рақиблар бўлиб, Эрон Исроилни ядровий ва ҳарбий хизматчилари қотилликларида айблаб келади.
Яқинда Эрон 22 май куни Теҳрондаги уйи олдида ўлдириб кетилган Инқилобий гвардия полковниги Сайёд Ҳодаийнинг ўлимида Исроилни айблаган эди.
Лапид Исроилнинг Эрон ичидаги ҳеч қандай амалиётига ишора қилмаган. Аммо унинг сўзларига кўра, яқинда Туркияга саёҳат қилган баъзи исроилликлар «жонлари сақлаб қолинганини билмаган ҳолда» уйга қайтиб келишган.
Лапиднинг айтишича, ҳужумчилар Исроил фуқароларини «ўғирлаш ёки ўлдириш учун» нишонга олган.
Лапид Туркия ҳукуматига «Исроил фуқароларининг ҳаётини ҳимоя қилиш йўлида қилган саъй-ҳаракатлари учун» миннатдорчилик билдирди, лекин аниқ тафсилотларни келтирмади.
Изоҳ (0)