2022 йил 10 июнь куни Тошкентда One Million Uzbek Coders Ўзбекистон ва Бирлашган Араб Амирликлари қўшма лойиҳаси натижаларига бағишланган тақдирлаш маросими бўлиб ўтди.
One Million Uzbek Coders лойиҳаси аҳолига дастурлаш ва рақамли технологиялар билан ишлашга оид кўникмаларни тақдим этишга йўналтирилган бепул онлайн платформа ҳисобланади.
Платформа маълумотлар таҳлили (Data Analysis), Android дастурлаш, front-end ва full-stack дастурлаш каби тўртта энг оммабоп йўналишни ўз ичига олади.
Бугунги кунга қадар One Million Uzbek Coders дастури бўйича рўйхатдан ўтганларнинг умумий сони 2,5 млн нафарни ташкил этади. Шулардан:
- 1 557 977 нафари иштирокчи сертификатига;
- 1 175 933 нафари дастурни муваффақиятли якунлаганлик бўйича сертификатга эга бўлди.
Умумий иштирокчиларнинг 90 фоизини мактаб ўқувчилари, 47 фоизини қизлар ташкил этади.
Тадбир доирасида лойиҳани амалга оширишда эришилган ютуқ ва натижалар, ахборот технологиялари соҳасида профессионал ривожланиш учун илк қадам сифатида хизмат қилган One Million Uzbek Coders битирувчиларининг ҳикоялари ҳақида видеороликлар намойиш этилди.
Номзодлар қуйидаги номинациялар бўйича тақдирланди:
- «Энг фаол ҳудуд» – Хоразм вилояти;
- «Энг фаол университет» – Тошкент ахборот технологиялари университети;
- «Энг фаол мактаб» – Қашқадарё вилояти, 9-сонли ўрта умумтаълим мактаби;
- «Энг фаол ментор» — Тошбоев Бобомурод;
- «Энг фаол талаба» – Фарруҳ Салиев, Тошкент ахборот технологиялари университети;
- «Энг фаол оила» – Холовлар оиласи.
2021 йилда One Million Uzbek Coders битирувчилари учун Бирлашган Араб Амирликлари билан ҳамкорликда умумий мукофот жамғармаси 100 минг долларни ташкил этувчи 3 та мусобақа, яъни Спорт дастурлаш, Open Дата Challenge ва Students Cup чемпионатлари ўтказилган эди.
Бундан ташқари, лойиҳанинг фаол иштирокчилари ўртасида соврин жамғармаси 6 минг долларни ташкил этувчи онлайн танлов ўтказилиб, унда 12 минг киши иштирок этди.
2021 йилда One Million Uzbek Coders лойиҳаси доирасида малака ошириш курсларини тамомлаган умумтаълим мактабларининг 100 нафар энг фаол информатика фани ўқитувчилари тақдирланди.
One Million Uzbek Coders дастури доирасида 7 та саралаш босқичи ўтказилиб, IT-таълим бўйича 250 та Nanodegree гранти эгалари аниқланди.
Изоҳ (0)