Қашқадарё вилоятининг Чироқчи туманида артизан қудуғига тушиб кетган бола қутқарилди, деб хабар беради ФВВ матбуот хизмати.
Маълум қилинишича, 12 июнь куни соат 14:01 ларда туманнинг Лангар қишлоғида яшовчи фуқаро вилоят ФВБга мурожат қилиб, соат 13:30 ларда ўзларига тегишли бўлган дала майдонида қазилган, 200 диаметрли сувсиз артизан қудуққа 6 ёшли ўғли тушиб кетганини билдириб, ёрдам сўраган.
Воқеа жойига зудлик билан вилоят ФВБ қутқарувчилари ва тегишли хизматлар куч-воситалари етиб борган. Қутқариш ишларига ФВБ махсус техникалари, яъни экскаватор ва грейдер жалб этилган.
Олиб борилган махсус қутқариш операцияси натижасида бола 13 июнь куни соат 10:25 да қутқариб олинган. Айни вақтда боланинг аҳволи яхши. Малакали тиббий хизмат кўрсатиш учун тез тиббий ёрдан ходимларига топширилган.
Бундан олдин Сирдарё дарёсидаги оролчада машинаси билан қолиб кетган фуқаро қутқарилгани тўғрисида хабар берилганди.
Изоҳ (0)