Жонни Депп Эмбер Хёрд унга тўлаши керак бўлган пулнинг 8 млн долларидан воз кечиши мумкин

Маълумки, Жонни Депп ва Эмбер Хёрд ўртасидаги шов-шувли суд жараёни бир неча кун аввал якунига етди. Кўпчилик кутганидек, актриса туҳмат қилганликда айбланиб, 10 миллион доллар ва яна жарима сифатида 5 миллион доллар тўлаши кераклиги аён бўлди. Аммо «Аквамен» юлдузининг адвокатлари Эмбер Хёрдда бундай маблағ йўқлигини таъкидламоқда. Миш-мишларга кўра, Эмбер тез орада касодга учраганлик тўғрисида ариза бермоқчи, деб ёзади Grazia.

Суд жараёни анча узоқ давом этгани сабабли, Жоннининг адвокатлари ҳам етарлича машҳурликка эришди. Камилла Васкес ва Бенжамин Чу Америка телевидениесида кўриниш бериб, ишга ёлловчининг ҳис-туйғулари ҳақида гапириб берган. Уларнинг сўзларига кўра, сўнгги олти йил ичида актёр ҳеч қачон бунчалик бахтли бўлмаган.

Бундан ташқари, адвокатлар Эмбернинг Жонни фақат ўзининг обрўси ва машҳурлиги туфайли судда ғалаба қозонгани ҳақидаги сўзларини рад этган. «Хёрд хоним ҳакамлар ҳайъатини ёқтирмади, чунки у жаноб Деппдан фарқли ўлароқ, ўз масъулиятини тан олишга тайёр эмас эди», — деб таъкидлади адвокатлар.

Шунингдек, улар актёр собиқ рафиқаси тўлаши керак бўлган пулдан воз кечиши мумкинлигини қўшимча қилди. «Албатта, биз буни тўлиқ ишонч билан айта олмаймиз, лекин жаноб Депп учун ҳозирги жараён фақат бойиш билан эмас, балки обрў-эътиборни тиклаш билан боғлиқ», — дея қўшимча қилди Васкес.

Эслатиб ўтамиз, суд жараёни бошланганидан бери рекламасида Жонни Депп суратга тушган Dior Sauvage’га талаб деярли икки баравар ошган.