Ижтимоий тармоқларда бир неча фуқаролар ИИБ томонидан олиб кетилаётгани акс этган видео тарқалди. Тармоқда тарқалган видеода воқеа Сурхондарё вилояти Шўрчи туманида содир бўлгани, жанжал фуқаронинг уйи ва ғиштхонаси МИБ томонидан бузиб ташлангани оқибатида келиб чиққани айтилган. МИБ матбуот хизмати ҳолат юзасидан «Дарё»га расмий маълумот берди.
Аниқланишича, фуқаролик ишлари бўйича Денов туманлараро судининг 2022 йил 2 февралдаги суд қарорига асосан жавобгарлар Б.I., Ж.Н., I.Н., Ғ.О. ва Г.I.ни Олтинсой тумани «Гулчечак» маҳалласида жойлашган нотурар жой (паррандачилик фермаси) биносининг ер майдони қурилган ғишт заводи, яшаш уйи, молхона ва бошқа қурилмаларни қарздорлар ҳисобидан бузиш ҳамда уй-жойдан чиқариш белгиланган.
Мазкур ижро ҳужжати бюронинг Олтинсой туман бўлими томонидан ижро ҳаракатларига киришилган ва жавобгарларга бир неча бор суд қарори тушунтирилиб, огоҳлантирилган. Бироқ жавобгарлар суд қарори талабларини бажармасдан ўз ихтиёрлари билан қурилмаларни бузмаган.
Шундан сўнг бюронинг туман бўлими томонидан мажбурий ижро ҳаракатларига киришилган ва 8 июнь куни мажбурий ижро тайинланиб, тегишли ташкилотлар иштирокида мажбурий ижро ҳаракатлари амалга оширилган.
Мажбурий ижро ҳаракатлари давомида жавобгарлар томонидан қаршиликлар кўрсатилгани сабабли ички ишлар ходимлари томонидан иштирокчиларнинг хавфсизлиги таъминланган.
Қайд этилишича, ҳозирда мажбурий ижро ҳаракатлари кейинги даврда амалга ошириш учун қолдирилган. Ҳолат натижалари ҳақида қўшимча маълумотлар берилади.
Вилоят ИИБ матбуот хизмати хабарига кўра, жавобгарлар ижро ҳаракатлари бажарилишига тўсқинлик қилиб, ходимларни ҳаракатларига фаол қаршилик кўрсатиб, маъсулларга тош ва ғишт бўлакларини отган. Натижада давлат органлари ходимларига тан жароҳати етказган тўрт нафар фуқаро мажбурий тарзда туман ИИБга олиб борилиб, уларга нисбатан тегишли ҳужжатлар расмийлаштирилган.
Ҳолат юзасидан ўрнатилган тартибда текширув ишлари ўтказилмоқда.
Изоҳ (0)