Турли важлар билан тўланмай келинаётган солиқ қарздорликларини ундириш мақсадида Фарғона вилояти давлат солиқ бошқармаси томонидан Мажбурий ижро бюроси вилоят бошқармаси билан ҳамкорликда вилоятнинг барча шаҳар ва туманларида хатлов тадбирлари олиб борилмоқда. Бу ҳақда вилоят ДСБ ахборот хизмати хабар берди.
Маълум қилинишича, 2022 йил июнь ойи бошидан ҳозирга қадар ўтказилган тадбирлар натижасида солиқдан қарздорлиги мавжуд бўлган 12 та тадбиркорлик субъекти 1,2 миллиард сўм миқдоридаги тўловларни амалга оширган. Хусусан, Фарғона туманида рўйхатдан ўтган «Қўрғон сифат» МЧЖ вакиллари билан мавжуд солиқ қарздорлиги юзасидан ўтказилган суҳбат натижасида 310 миллион сўм миқдоридаги солиқлар давлат бюджетига тўлаб берилган.
Фарғона шаҳридаги «Сайёр-2017» МЧЖдан эса 201 миллион сўм солиқ қарздорлиги ундирилган. Бундан ташқари, қарздорлиги катта бўлган 36 та субъектнинг қарийб 48 миллиард сўм қийматдаги мол-мулклари хатловга олинган. Жумладан. Қўштепа туманидаги «Техмашсервис» МЧЖнинг 1,2 миллиард солиқ қарздорлиги учун жамиятнинг бино иншоотлари хатланиб, муҳрланган.
Шунингдек, узоқ вақтдан буён солиқлар тўланмаслиги натижасида 5,8 миллиард сўм миқдоридаги қарздорлиги юзага келган «Иссиқлик манбаи» ДУКнинг ҳам бино-иншоотлари хатловга олинган.
Ўзбекистон туманида олиб борилган тадбирларда эса «Шўрсув ғишт завод» МЧЖнинг 82 миллион сўм солиқ қарзи ҳисобига жамиятга тегишли Nexia русумли транспорт воситаси хатланиб, вақтинча сақлаш жойига олиб кирилган.
Эслатиб ўтамиз, май ойида Фарғонада бир кунда солиқ қарздорларининг 8,1 миллиард сўмлик мол-мулклари хатловга олинганди.
Изоҳ (0)