Бухоро шаҳри Пиридастгир кўчасидан ўтувчи марказий ичимлик суви қувурида носозлик юзага келгани туфайли 12 июнь куни шаҳар аҳолисининг ичимлик суви таъминоти вақтинча тўхтатилди. Бу ҳақда «Ўзсувтаъминот» хабар қилди.
Қайд этилишича, Бухоро вилоят ҳокими Ботир Зарипов таъмирлаш ишлари олиб борилаётган жойга бориб, жараён билан шахсан танишган. Айни пайтда таъмирлаш ишлари давом этмоқда. Шиша толали ҳобуснинг диаметри 700 миллиметр бўлган пўлат қувурга алмаштириш режалаштирилган. Шундан сўнг қувурни пайвандлаш ишлари амалга ошилириб, якунда шаҳарда сув таъминоти тикланади.
«Ишларни жадаллаштириш, шаҳарда сув таъминотини тиклаш бўйича мутасаддиларга тегишли тавсиялар берилган», — дейилади хабарда.
Бухоро вилояти ҳокимлиги сув таъминотидаги узилиш ҳақида кеча, 11 июнь куни соат 15:12 да хабар қилди. Бундан келиб чиқадики, шаҳар аҳолиси қарийб 20 соатдан буён сувсиз қолмоқда.
12 июнь куни соат 06:23 да берилган маълумотда эса носозликни бартараф этиш чоралари кўрилаётгани, тез орада сув таъминоти тикланиши ҳақида хабар берилган.
Аввалроқ Ўзбекистонда ичимлик суви таъминоти оғир ҳолатдаги 1545 та маҳалла сув билан таъминланиши, Тошкентда ичимлик сувини режали ўчириш жадвали эълон қилингани, Қашқадарёда 1 823 километр ичимлик суви тармоқлари, 74 та сув иншооти қурилиб, реконструкция қилиниши ҳақида хабар берилган.
Изоҳ (0)