Олий Мажлис Қонунчилик палатасининг 11 июнь куни бўлиб ўтган навбатдаги мажлисида сиёсий партиялар фракциялари таклифлари асосида маромига етказилган учта қонун лойиҳаси кўриб чиқилди. Бу ҳақда палата ахборот хизмати хабар қилди.
Қайд этилишича, мажлисда депутатлар ташаббуси билан ишлаб чиқилган «Ўзбекистон Республикасининг референдуми тўғрисида»ги қонун кўриб чиқилган. Унга кўра, қонунга Сайлов кодексига сўнгги йилларда киритилган ўзгартишлардан келиб чиққан ҳолда референдум ўтказувчи комиссиялар ваколатларини аниқлаштириш, комиссиялар қарорлари юзасидан берилган шикоятларни кўриб чиқиш, кузатувчиларнинг ҳуқуқларини кенгайтириш ва бошқа бир қатор тузатишлар киритиш назарда тутилган.
Шунингдек, «Халқ депутатлари маҳаллий Кенгашларига сайлов жараёни такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартишлар киритиш тўғрисида»ги ва «Халқ депутатлари вилоят, туман ва шаҳар Кенгаши депутатининг мақоми тўғрисида»ги қонунлар тўлдирилиб, бир қатор қоидалар ўрнатиш белгиланган.
Депутатлар юқоридаги учта қонун лойиҳаларини «Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ягона қонун лойиҳасига бирлаштириб, учинчи ўқишда қабул қилган.
Бундан ташқари, Қонунчилик палатаси мажлиси яна жонли эфирга узатилмади. Аввалроқ роппа-роса 1 ой давомида мажлислар жонли эфирда ёритилмагани, шундан сўнг 28 май кунги ялпи мажлис видеоконференцалоқа тарзида ўтказилиши режалаштирилгани ҳақида хабар қилинганди.
Президентнинг 2021 йил июнда қабул қилинган «Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида»ги фармонида Ўзбекистон Миллий телерадиокомпанияси 1 декабрдан Олий Мажлис Қонунчилик палатаси ва Сенати мажлислари, Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар кенгаши сессиялари (ёпиқ мажлислар бундан мустасно) телеканаллар, шунингдек, Интернет тармоғи орқали жонли эфирга узатилишини таъминлаши белгиланганди.
Аввалроқ Конституциянинг никоҳга оид бандига ўзгартириш киритиш таклифи билдирилгани, Акмал Саидов Ўзбекистон парламентар республикага ўтишига эрта эканини айтгани ҳақида хабар берилганди.
Изоҳ (0)