Ижтимоий тармоқларда Бухоро вилояти Когон шаҳрининг «Газчилар» қўрғонида жойлашган магистрал газ қувурлари бошқармасига қарашли компрессор станциясида авария содир бўлгани тўғрисида видеолар тарқалди. Вилоят Фавқулодда вазиятлар бошқармаси ахборот хизмати раҳбари Миржон Файзуллаевнинг «Дарё»га хабар беришича, содир бўлган кучли ёнғинни ўчириш учун бир соатдан ортиқ вақт сарфланган.
Таъкидланишича, бугун, 11 июнь куни соат 04:10 да Когон шаҳар «Газчилар» қўрғони 5-уйда жойлашган Когон магистрал газ қувурлари бошқармасида ёнғин содир бўлган.
Бинонинг асосий умумий майдони 45х16 бўлиб, корхонада 4 та газ ҳайдаш ускунаси мавжуд. Ёнғин бинодаги 1-газ ҳайдаш ускунасида содир бўлган. Ёнғин натижасида корхонанинг 720 кв/м майдонида том қисми, ички деворлари ва ичидаги агрегатлар қисман ёнган. Ёнғин соат 04:40 да ўраб олиниб, 05-50 да ўчирилган.
«Воқеа жойига 10 та ёнғин-қутқарув автоэкипажи жалб этилди. Ёнғиннинг тахминий сабаби технологик жараённинг бузилиши оқибатида содир бўлгани аниқланмоқда», — деди Миржон Файзуллаев.
Ҳозирда моддий зарар миқдори ёнғин техник комиссияси томонидан аниқланмоқда. Ёнғин оқибатида фуқароларнинг куйиш тан жароҳати ва ҳалок бўлиш ҳолатлари қайд этилмаган.
Изоҳ (0)