Тошкент вилояти Зангиота туманида валюта айирбошлаш фаолияти билан шуғулланиб келган фуқаро ушланди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департамент ҳамда ИИБнинг Зангиота тумани бўлимлари томонидан тезкор тадбир ўтказилган. Унда фуқаро А.Т. Чилонзор тумани «Бектўпи» бозор ҳудудида мунтазам валюта айирбошлаш фаолияти билан шуғулланиб келгани аниқланган. У фуқаро У.га 4 300 долларни 47,4 миллион сўмга сотган вақтида ашёвий далиллар билан ушланган.
Ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилган. Ҳозирда тергов ҳаракатлари ўтказилмоқда.
Аввалроқ Тошкент, Андижон ва Қашқадарё вилоятларида ноқонуний валюта айирбошлаш ҳолатларига чек қўйилгани, Хоразм ва Қашқадарёда жами 5,2 минг долларни ноқонуний сотишга уринган валютафурушлар ушлангани, Қашқадарёда валютафуруш 2,5 минг долларни сотаётганида қўлга тушгани тўғрисида хабар берилганди.
Изоҳ (0)