Ijtimoiy tarmoqlarda Buxoro viloyati Kogon shahrining “Gazchilar” qo‘rg‘onida joylashgan magistral gaz quvurlari boshqarmasiga qarashli kompressor stansiyasida avariya sodir bo‘lgani to‘g‘risida videolar tarqaldi. Viloyat Favqulodda vaziyatlar boshqarmasi axborot xizmati rahbari Mirjon Fayzullayevning “Daryo”ga xabar berishicha, sodir bo‘lgan kuchli yong‘inni o‘chirish uchun bir soatdan ortiq vaqt sarflangan.
Ta’kidlanishicha, bugun, 11-iyun kuni soat 04:10 da Kogon shahar “Gazchilar” qo‘rg‘oni 5-uyda joylashgan Kogon magistral gaz quvurlari boshqarmasida yong‘in sodir bo‘lgan.
Binoning asosiy umumiy maydoni 45x16 bo‘lib, korxonada 4 ta gaz haydash uskunasi mavjud. Yong‘in binodagi 1-gaz haydash uskunasida sodir bo‘lgan. Yong‘in natijasida korxonaning 720 kv/m maydonida tom qismi, ichki devorlari va ichidagi agregatlar qisman yongan. Yong‘in soat 04:40 da o‘rab olinib, 05-50 da o‘chirilgan.
“Voqea joyiga 10 ta yong‘in-qutqaruv avtoekipaji jalb etildi. Yong‘inning taxminiy sababi texnologik jarayonning buzilishi oqibatida sodir bo‘lgani aniqlanmoqda”, — dedi Mirjon Fayzullayev.
Hozirda moddiy zarar miqdori yong‘in texnik komissiyasi tomonidan aniqlanmoqda. Yong‘in oqibatida fuqarolarning kuyish tan jarohati va halok bo‘lish holatlari qayd etilmagan.
Izoh (0)