«Очиқ бюджет» ахборот порталида янги «Жамоатчилик назорати» функцияси ишга туширилди, деб хабар беради Молия вазирлиги.
Маълум қилинишича, ахборот порталида рўйхатдан ўтган ташаббускор фуқаролар мазкур бўлимда ғолиб деб топилган таклифларининг ижросини бевосита кузатиш ҳамда амалга оширилган ишлар юзасидан матн ёки фотосурат кўринишида изоҳ юклаш имкониятига эга бўлади.
Таъкидланишича, эндиликда лойиҳаларнинг амалга оширилиши бевосита фуқаролар томонидан баҳолаб борилади ҳамда ушбу овозлар натижасига кўра «Ҳудудлар рейтинги» эълон қилинади.
Аввалроқ Шавкат Мирзиёев видеоселектор йиғилишида «Ташаббусли бюджет» портали орқали аҳолидан тушган 20 мингта ёки жами таклифларнинг 25 фоизи ҳам ички йўлларни яхшилаш билан боғлиқлигини айтиб, масъулларга йўллар сифатини яхшилаш топшириғини берганди.
Мавзуга доир: Ўзбекистонда ташаббусли бюджет жараёнларида ғолиб бўлолмаган айрим лойиҳалар учун ҳам маблағ ажратилади
Эслатиб ўтамиз, 2021 йил 9 июль куни Ўзбекистон Молия вазирлиги янгиланган «Очиқ бюджет» порталини ишга туширган, у ерда давлат бюджети, давлат қарзи ҳақида маълумот эълон қилинади ва «Ташаббусли бюджет» бўлими яратилган. «Ташаббусли бюджет» доирасида туман ва шаҳарларда фуқароларнинг ташаббусларини молиялаштиришга 117 миллиард сўм ажратилган.
Изоҳ (0)