“Ochiq budjet” axborot portalida yangi “Jamoatchilik nazorati” funksiyasi ishga tushirildi, deb xabar beradi Moliya vazirligi.
Ma’lum qilinishicha, axborot portalida ro‘yxatdan o‘tgan tashabbuskor fuqarolar mazkur bo‘limda g‘olib deb topilgan takliflarining ijrosini bevosita kuzatish hamda amalga oshirilgan ishlar yuzasidan matn yoki fotosurat ko‘rinishida izoh yuklash imkoniyatiga ega bo‘ladi.
Ta’kidlanishicha, endilikda loyihalarning amalga oshirilishi bevosita fuqarolar tomonidan baholab boriladi hamda ushbu ovozlar natijasiga ko‘ra “Hududlar reytingi” e’lon qilinadi.
Avvalroq Shavkat Mirziyoyev videoselektor yig‘ilishida “Tashabbusli budjet” portali orqali aholidan tushgan 20 mingta yoki jami takliflarning 25 foizi ham ichki yo‘llarni yaxshilash bilan bog‘liqligini aytib, mas’ullarga yo‘llar sifatini yaxshilash topshirig‘ini bergandi.
Mavzuga doir: O‘zbekistonda tashabbusli budjet jarayonlarida g‘olib bo‘lolmagan ayrim loyihalar uchun ham mablag‘ ajratiladi
Eslatib o‘tamiz, 2021-yil 9-iyul kuni O‘zbekiston Moliya vazirligi yangilangan “Ochiq budjet” portalini ishga tushirgan, u yerda davlat budjeti, davlat qarzi haqida ma’lumot e’lon qilinadi va “Tashabbusli budjet” bo‘limi yaratilgan. “Tashabbusli budjet” doirasida tuman va shaharlarda fuqarolarning tashabbuslarini moliyalashtirishga 117 milliard so‘m ajratilgan.
Izoh (0)