Тошкентда ИИБ ходимлари ёшларни ургани ва таҳқирлагани айтилмоқда

Ижтимоий тармоқларда Тошкентда ички ишлар органи ходимлари бир гуруҳ ёшларни ургани ва жинсий таҳқирлагани айтилган хабарлар тарқалди. Бу ҳақда «Nemolchi.uz» лойиҳаси маълум қилди.

Жабрланган ёшларнинг сўзларига кўра, улар уйларининг яқинида ўтирганида ҳужжатларни текшириш учун ички ишлар ходимлари мурожаат қилган. Ҳужжатлар тақдим этилиб, текширилган бўлса-да, ходимлар барибир уларни ИИБга олиб боришларини айтган. Қиз ҳеч қаёққа бормаслигини, бунга сабаб йўқлигини билдирган, лекин ходимлар уларнинг қўлларини қайириб, машинага солиб олиб кетган. Қиз телефонга ёзиб олаётганда телефонини олиб қўйган ва ҳамма нарсани ўчириб ташлаган. Улар Мирзо Улуғбек тумани ИИБга олиб келинган, базада текширилган ва қонунбузарлик ҳолатлари бўлмагани учун қўйиб юборилган.

Шундан сўнг, икки нафар ИИБ ходими уларни қўйиб юбормай, телефонларини олиб, қаергадир олиб кетмоқчи бўлган. Қиз яна рад жавобини бериб, уйига боришини айтган. Бунга жавобан ходимлардан бири унинг қўлидан ушлаб, судраб машинага олиб борган ва бор кучи билан юзига мушт туширган ва бурнини синдирган. Йигит қизни ҳимоя қиламан деса уни боғлаб, қўлига кишан солгани, бир неча марта урган, шунингдек, уни ҳам машинага солишган.

Йўлда қиз қаерга олиб кетишаётганини сўрган, лекин ходимлар мийиғида кулиб, жинсий зўравонлик билан таҳдид қилган. Йигит унинг тарафини оламан, деса уни машинада дубинка билан калтаклай бошлашган. Қиз қўрқувдан қоча бошлаган, бироқ ходимлардан бири унинг орқасидан етиб олган ва унинг кўкраги ва ошқозонига тепган, сўнг уни машинага қамаб қўйган.

Эртаси куни қизнинг яқинлари бўлимга боришган ва ИИБ ходимлари устидан ариза ёзиб берган. Тошкент шаҳар ИИББ «Nemolchi.uz» сўровига жавобан хизмат текшируви тайинланганини айтган.

Бош прокуратура матбуот котибига кўра, айни вақтда ҳолат бўйича Мирзо Улуғбек прокуратураси томонидан терговга қадар текширув ҳаракатлари ўтказилмоқда.