Конституциянинг 38-моддасига ўзгартириш ва қўшимча киритиш таклиф этилмоқда. Бу ҳақда бугун, 10 июнь куни бўлиб ўтаётган Конституцивий комиссия йиғилишида Сенатнинг Аграр ва сув хўжалиги масалалари қўмитаси раиси Баҳодир Тожиев маълум қилди.
Баҳодир Тожиевнинг айтишича, 38-моддага ўзгартириш киритиш барча шахслар дам олиш ҳуқуқига эганини таъминлашда муҳим аҳамиятга эга.
«38-моддада: «Ёлланиб ишлаётган барча фуқаролар дам олиш ҳуқуқига эгадирлар. Иш вақти ва ҳақ тўланадиган меҳнат таътилининг муддати қонун билан белгиланади», деб амалдаги таҳририда кўрсатилган эди. Бу моддага Конституциявий комиссия аъзолари ва 11 нафар фуқародан келган таклифлар асосида ўзгартириш киритиш таклиф қилинмоқда.
Яъни «Ҳар бир шахс дам олиш ҳуқуқига эга. Меҳнат шартномаси бўйича ишловчига қонунда белгиланган иш вақтининг давомийлиги, дам олиш ва байрам кунлари, ҳақ тўланадиган ҳар йилги таътил кафолатланади», деб аниқ таклиф киритиляпти», – деди Конституцион комиссия аъзоси.
Мажлисда айтилишича, мазкур қўшимча билан нафақат ёлланиб ишлаётган фуқаролар, балки барча шахслар дам олиш ҳуқуқига эга экани таъминланади.
Изоҳ (0)