Асрлар давомида мол гўшти ёки чўчқа гўшти истеъмолчилар томонидан кўпроқ афзал кўрилган. Bloomberg нашри қандай қилиб товуқ гўшти дунёда биринчи рақамли гўшт истеъмолига айланишини таҳлил қилди.
2022 йилда дунё бўйлаб товуқ гўштининг истеъмоли 98 млн тоннага етиши кутилмоқда. Бу 1999 йилдагидан икки баравар кўп.
Бу АҚШ ҳукумати маълумотларига кўра, чўчқа гўштининг ўсиш суръатидан уч баравар ва мол гўштиникидан 10 баравар кўпдир.
Глобал товуқ истеъмоли 2030 йилга бориб гўшт истеъмолининг 41 фоизини ташкил қилади. Шу тариқа одамлар биринчи марта товуқ гўштини бошқа ҳар қандай оқсилга қараганда кўпроқ истеъмол қила бошлайди.
Генетика ва бошқа инновациялар туфайли товуқларни боқиш харажатлари йиллар давомида бир неча бор пасайган.
Замонавий товуқлар тухумдан чиққанидан олти ҳафта ўтгач, сўйиш учун тайёр бўлади. Бу вақт ичида улар озуқани бошқа ҳайвонларга қараганда тезроқ оқсилга айлантиради.
Иқтисодчиларнинг фикрича товуқ гўшти миқдорини оширишнинг чегаралари бўлиши мумкин, аммо инсоният уларни топа олганича йўқ.
Бразилиядан Хитойгача бўлган йирик иқтисодиётларда парранда гўштига ўтиш тезлашмоқда. Бунга инфляция ҳайвон гўштини дунё аҳолисининг кўп қисми учун жуда қимматга айлантираётгани сабаб бўляпти.
Пандемия ва Украинадаги уруш туфайли озиқ-овқат таъминоти занжирларидаги тартибсизлик бу тенденцияни янада кучайтирди.
Парранда гўшти истеъмоли кўпайишининг салбий тарафлари ҳам бор. Товуқ энди шунчалик тез килограмм йиғадики, унинг мушаклари буни ушлаб туролмайди ва гўшт миқдори ошади.
Бироқ парранда гриппи эпидемияси саноат ишлаб чиқариш усулларидан кўпроқ фойдаланиш туфайли каттароқ ва жиддийроқ кўринишда юзага келади.
Озиқ-овқат саноатига сармоя киритувчи фирма раҳбарларидан бирининг айтишича, парранда гўштининг умумий маҳсулотга нисбатан ишлаб чиқариш таннархи 30 йил олдингига нисбатан учдан бирига тушиб кетган.
Фермерлар бошқа ҳайвонлар учун ҳам худди шундай натижага қандай эришиш мумкинлигини аниқлай олишмади. Шу тариқа товуқ гўшти «иқтисодиёт гўшти»га айланмоқда.
Хитойдаги баъзи ресторанлар энди чўчқа гўштини умуман таклиф қилмаяпти. Бир неча йил олдин буни тасаввур қилиб бўлмасди.
Бразилияликлар бу йил инфляция мол гўштини нархини ошириб юборгани учун товуқ гўштини кўпроқ истеъмол қилмоқда.
Дунёдаги энг йирик парранда гўшти экспортчиси бўлган Бразилия ишлаб чиқаришни 4,5 фоизга ошириб, рекорд даражага етказди. Европа, Жанубий Африка ва Мексикада ҳам талаб ортиб бормоқда.
Товуқлар жуда тез ўсганлиги сабабли, парранда гўшти мол гўштидан кўра иқлимга кўпроқ мос келади. Қорамол боқиш оқибатида ҳосил бўладиган иссиқхона газлари эмиссияси тобора кескинроқ танқид қилинмоқда.
Баъзи ресторанлар ва компаниялар яшил табиатга ёрдам бериш учун ҳам парранда гўштига мурожаат қилмоқда.
Америкадаги Panera Bread компанияси яқинда Жаҳон ресурслари институти нотижорат ташкилоти томонидан ишлаб чиқилган товуқ гўштидан иборат экологик тоза таомлар менюси бўлган Cool Food Mealс рекламасини бошлади.
Саноат товуқларини ишлаб чиқариш ҳам экологик муаммоларни келтириб чиқаради, чунки интенсив озиқлантириш операциялари чиқиндиларни тўплайди ва ҳид муаммоларига олиб келиши мумкин.
Товуқ гўшти истеъмолчиларнинг талабларига жавоб бера олмаганида бу қадар тез оммалашиб кетолмасди. Товуқ ишлаб чиқарувчи компанияларнинг маълум қилишича, одамлар учун биринчи навбатда гўштнинг таъми муҳимроқ бўляпти. Тадқиқотчилар парранда гўштининг бу жиҳати устида ҳам қаттиқ ишламоқда.
Изоҳ (0)