АҚШ Вакиллар палатаси қурол назорати тўғрисидаги қонун лойиҳаларини қабул қилди. Қонун лойиҳаси Buffalo (Нью-Йорк) ва Ювалда(Техас)да содир этилган оммавий отишмалардан кейин жорий қилинган эди.
«Фарзандларимизни ҳимоя қилиш тўғрисида»ги қонун деб номланган пакетнинг қабул қилинишини 223 киши ёқлаган, 204 киши қарши овоз берган ва бир республикачи бетараф қолган.
Қонун лойиҳаларида ярим автоматик қурол сотиб олишнинг минимал ёшини 18 ёшдан 21 ёшга кўтариш назарда тутилган. Бундан ташқари, сиғими 15 та патрондан ортиқ ўқдонлардан фуқароларнинг фойдаланиши тақиқланади.
Шунингдек, қонун турар жой биноларида ўқотар қуролларни сақлашни тартибга солувчи талабларни белгилайди ва уларни бузганлик учун жиноий жавобгарликни назарда тутади.
Энди қонун лойиҳалари пакети овоз бериш учун Сенатга юборилиши керак, у ерда пакетни қабул қилиш учун 60 кишининг овоз керак бўлади.
Май ойи ўрталарида қуролланган ўсмир Buffalo супермаркетида отишма содир этган эди, оқибатда 10 киши ҳалок бўлган, яна уч киши яраланган. Икки ҳафтадан камроқ вақт ўтгач, яна бир ўсмир Ювалдадаги бошланғич мактабда отишма содир этиб, 21 кишининг ўлимига сабабчи бўлди, улардан 19 нафари болалар эди. Иккала ҳужумчи ҳам 18 ёшда эди.
Изоҳ (0)