Испания жанубида давом этаётган ўрмон ёнғинлари муносабати билан 3000 га яқин одам эвакуация қилинди, ёнғинларни бартараф қилиш учун эса 1000 га яқин ўт ўчирувчи юборилди, деб хабар бермоқда «Интерфакс».
Ёнғин 8 июнь куни Андалусия автоном жамоатчилигидаги Пухерра тоғ ёнбағирларида бошланган. Кун охирида расмийлар аҳолини эвакуация қилишни бошлади, одамлар Малага провинциясининг бешта туманидан олиб чиқилди, уларнинг аксарияти қариндошлариникига ёки меҳмонхоналарга жойлаштирилди.
Ёнғинга қарши курашда уч нафар ўт ўчирувчи тан жароҳати олди, улардан бири оғир куйиш жароҳатлари билан Малага шифохонасига етказилди.
Расмийларнинг билдиришича, йирик ҳодисалар юз берганда фуқаролик кучларига ёрдам бериш вазифаси юкланган ҳарбий фавқулодда вазиятлар бўлинмаси ҳудудга 233 нафар аскар ва 80 дан ортиқ техникасини жўнатган.
Испаниянинг AEMEТ об-ҳаво хизмати мамлакатга кучли жазирама тўлқини келишини маълум қилган: прогнозларга кўра, ҳаво ҳарорати Цельсий бўйича 30 даражадан ошади ва дам олиш кунларида ҳам кўтарилишда давом этади.
Изоҳ (0)