Янги Зеландия Россия ва Беларуснинг 44 та корхонасига қарши санкциялар жорий қилди

Янги Зеландия Россия ва Беларуснинг 44 компаниясига, жумладан, «Газпром» ва Беларусь мудофаа корхоналарига қарши санкциялар киритди.

«Қирқ тўртта ташкилот, жумладан, олтита Беларусь мудофаа корхонаси сўнгги санкциялар остида қолди. Янги зеландияликларга бу компаниялар билан ишлаш тақиқланади», — деди Янги Зеландия Ташқи ишлар вазирлиги раҳбари Наная Маҳута.

Ҳукумат сайтида эълон қилинган хабарга кўра, санкциялар рўйхатида «Газпром», шунингдек, қурол ва ҳарбий техника ишлаб чиқариш билан шуғулланувчи ташкилотлар бор.

Унда қайд этилишича, санкциялардан жабр кўрган корхоналар «Россия учун стратегик аҳамиятга эга», чунки улар мамлакатни хом ашё, инфратузилма, алоқа, транспорт, қурол-яроғ ва молия билан таъминлайди.

Илгари Янги Зеландия Россиядан жисмоний шахслар, молия институтлари ва мудофаа корхоналарини санкциялар рўйхатига киритган эди.

Евроиттифоқ Россияга қарши санкцияларнинг олтинчи пакети доирасида «Яндекс» компанияси асосчиси Аркадий Воложни санкция рўйхатларига киритган эди. Шундан сўнг Волож  барча лавозимларидан бўшади. Компания акциялари эса тушиб кетди.