Ўзбекистонда 2022 йилда ИШИД ҳамда «Тавҳид ва жиҳод катибаси» халқаро террорчилик ташкилотлари жангариларига алоқадор 4 та яширин гуруҳ, якка тартибда радикаллашиб, экстремистик ташкилот ва оқимлар ғояларини тарғиб қилиб келган 10 та виртуал гуруҳ ҳамда 250 нафар экстремистик гуруҳ аъзолари аниқланиб, уларнинг ноқонуний фаолиятига чек қўйилди. Бу ҳақда Тошкент шаҳар ИИББ ахборот хизмати хабар берди.
Мазкур шахслар яшаб турган манзилларида экстремистик ва террорчилик ташкилотларининг ғояларини тарғиб қилиш, янги рекрутларни (номзодлар) ёллаб жангарилар лагерларига юбориш, терроризмни молиялаштириш ҳамда қўпорувчилик ҳаракатларини содир этишга ундаш билан шуғулланиб келган.
Хусусан, 2022 йилнинг бошида Тошкент шаҳрида 27 нафар шахсдан иборат яширин экстремистик гуруҳ фаолиятига чек қўйилган бўлиб, гуруҳнинг айрим аъзолари жанговар ҳаракатлар юз бераётган ҳудудларга боришни режалаштирган ва халқаро террорчилик гуруҳларини молиялаштириш билан шуғулланиб келган. Ҳозирги вақтда ИИВ Тергов департаменти томонидан ушбу гуруҳнинг 11 нафар аъзосига нисбатан Жиноят кодексининг тегишли моддалари жиноят иши қўзғатилиб, тергов ҳаракатлари олиб борилмоқда.
Бундан ташқари, олиб борилган тезкор-тергов ҳаракатлари давомида Тошкент вилоятида яшовчи 21 ёшли А.Ш. қўлга олиниб, у Сурия ҳудудидаги фаолият олиб бораётган «Тавҳид ва жиҳод катибаси» халқаро террорчилик ташкилоти ғоявий раҳнамоси А.Хамрабуваевнинг (тахаллуси «Ахлуддин Навкотий», Қирғизистон фуқароси) кўрсатмаси асосида Тошкент шаҳрида яшовчи 9 нафар шахсдан иборат яширин жамоат ташкил этган бўлиб, уларнинг айримлари Суриядаги жангарилар сафига бориб қўшилишни режалаштирган.
Шунингдек, Тошкент шаҳрида яшовчи, 18-27 ёш оралиғидаги, айримлари мактаб ўқувчилари ҳисобланган 10 нафар шахсдан иборат «Тавҳид ва жиҳод катибаси»нинг иккита яширин гуруҳи аниқланган. Ушбу гуруҳлар фаолияти «Тавҳид ва жиҳод катибаси»нинг Суриядаги масъулларидан бири «Абу Аҳмад узбекий» томонидан бошқарилган бўлиб, гуруҳ аъзолари пойтахтдаги маъмурий бинолар, аҳоли гавжум жамоат жойларида қўпорувчилик ҳаракатлари содир этишни режалаштирганлар ҳамда террорчилик ташкилотлари фаолиятини молиялаштириб келишган.
Кечиктириб бўлмайдиган тезкор-тергов тадбирлар натижасида гуруҳ аъзоларидан қўлбола портловчи қурилма таркибий қисмлари ва ниқобловчи буюмлар ашёвий далил сифатида олинган.
Гуруҳ аъзоларига нисбатан ИИВ Тергов департаменти томонидан Жиноят кодексининг 155, 244-1 ва 244-2-моддалари билан жиноят иши қўзғатилган.
Шу билан бирга, Сурияда террорчилик ташкилотлари сафида бўлиб, қидирувда бўлган қуйидаги шахсларнинг ижтимоий тармоқлар ва мессенжерлар орқали ўзларининг Ўзбекистондаги қариндошлари ва яқин алоқалари орасида ёллов ишларини олиб бориб, уларни террорчилик лагерларига чиқишга чорлаб келаётгани аниқланиб, ноқонуний ҳаракатларига барҳам берилди:
2022 йилда хорижий махсус хизматлар билан ҳамкорлик натижасида, қидирувда бўлган 59 нафар жангарилар ва террорчи-экстремистик ташкилотлар тарафдорлари қўлга олиниб, Ўзбекистонга депортация қилинган. Ушбу шахслар чет давлатларда террорчилик ташкилотлар сафига ёлланган бўлиб, уларнинг фаолиятни молиялаштириш, Суриядаги жангарилар лагерларига номзодларни ёллаш ва юбориш билан шуғулланган. Шунигдек, айримлари Ўзбекистонда ва ўзлари бўлиб турган мамлакатлар ҳудудида қўпорувчилик ҳаракатларини содир этишни режалаштириб келган.
Жумладан, 2022 йилнинг апрель ойида фарғоналик, 27 ёшли Х.К. Россия ҳудудида қўлга олиниб, Ўзбекистонга экстрадиция қилинган. Ушбу шахс 2014—2015 йилларда Суриядаги «Тавҳид ва жиҳод катибаси» террорчилик ташкилоти сафида жанговар-қўпоровчилик тайёргарлигидан ўтиб, Россия ҳудудида яширин гуруҳлар яратиш, террорчилик тузилмаларни молиялаштириш каналларини йўлга қўйиш учун ташкилот етакчилари Ш.Ш. ва К.Ш. томонидан юборилган. Х.К.га нисбатан ҳам жиноят иши қўзғатилган, дастлабки тергов ҳаракатлари олиб борилмоқда.
Кўрилган чоралар натижасида «Тавҳид ва жиҳод катибаси»нинг қидирувда бўлган Туркиягадаги жангариси — Самарқанд вилоятидан бўлган 24 ёшли Б.Д.нинг Москва ва Санкт-Петербург шаҳарларида серияли қатор террорчилик хуружларини амалга оширишга қаратилган ҳаракатларига чек қўйилган.
Бундан ташқари, Қашқадарё вилоятида туғилган 23 ёшли С.Х. Россия ҳудудида қўлга олиниб, Ўзбекистонга олиб келинган. Маълум бўлишича, у интернет орқали Суриядаги «Ҳаят Тахрир аш-Шом» халқаро террорчилик ташкилоти жангарилари сафига ёлланиб, қўлбола усулда портловчи қўрилмаларни ясаш бўйча ўқувдан ўтган ва Ўзбекистонда қайтганидан сўнг қўпорувчилик ҳаракатлари амалга оширишни режалаштирган.
«Ҳизб ут-Тахрир» диний-экстремистик ташкилотининг Тошкент шаҳри ва вилоятида яшовчи 5 нафар, муқаддам жазо ўтаб озодликка чиққан 10 нафар аъзоаининг ноқонуний фаолиятига чек қўйилган бўлиб, улар интернет орқали ташкилотнинг ғоявий раҳнамоларидан бири А.Холдаровнинг («Маҳмуд Абдулмўмин», Қиргизистон фуқароси, Руминияда яшириниб келмоқда.) ёллови таъсирига тушиб, ўзларининг маслакдошларидан иборат яширин гуруҳ тузган.
Шунингдек, Тошкент шаҳри ва вилояти ҳудудида талончилик, товламачилик, ўғирлик ва босқинчилик билан шуғулланиб келган 8 та уюшган жиноий гуруҳнинг фаолиятига барҳам берилган бўлиб, улар террорчилик ташкилотларининг ғоявий таъсирига тушиб, ноқонуний топилган даромадларидан экстремизмни молиялаштириб келган. Айримлари террорчилар лагерларига чиқиб кетишга тайёргарлик кўрган.
Хусусан, 2021 йилда Тошкент шаҳридаги «Техно олам» («Малика») савдо мажмуасида тизимли равишда мобил телефонлар ўғирлаш, фирибгарлик, талончилик жиноятлари содир этиб, ҳудуддаги қўриқлаш хизмати ходимларига тан жароҳати етказиш билан шуғулланувчи жиноий гуруҳ фаолиятига чек қўйилган.
Улардан 6 нафарига нисбатан жиноят ишлари қўзғатилиб, тергов давомида бошқа жиноятларга даҳлдор 50 дан ортиқ алоқалари аниқланган ва уларга нисбатан профилактик ва маъмурий таъсир чоралари қўлланилган.
Бундан олдин Хоразмда Суриядаги жангарилар сафига қўшилишни режалаштирган 4 нафар йигит ушлангани, ўзбекистонлик фуқаро МДҲ давлатларидан бирида қўпорувчилик ҳаракатини содир этмоқчи бўлгани аниқлангани, Тошкентда Сурияга бориб, жангарилар сафига қўшилишни режалаштирган талаба ва икки нафар мактаб ўқувчиси ушлангани тўғрисида хабар берилганди.
Мавзуга доир:
Изоҳ (0)