Ўзбекистоннинг АҚШ ва Канададаги элчиси Жавлон Ваҳобов Канаданинг Британия Колумбияси провинцияси қишлоқ хўжалиги, озиқ-овқат ва балиқчилик вазири Лана Попҳам билан учрашди, деб хабар беради «Дунё» агентлиги. Учрашувда томонлар Ўзбекистондан мавсумий ишчиларни жалб қилиш имкониятларини муҳокама қилган.
Элчи Лана Попхемни Ўзбекистон агросаноатидаги салоҳият, жумладан, республикада қишлоқ хўжалигини модернизация қилиш борасида амалга оширилаётган ислоҳотлар, ҳудудларнинг ўзига хослиги ва иқтисослашувини ҳисобга олган ҳолда фермерларни қўллаб-қувватлаш тизими билан таништирган.
Тақдимот чоғида 2020—2030 йилларга мўлжалланган Қишлоқ хўжалигини ривожлантириш стратегияси ва Ўзбекистон сув хўжалигини ривожлантириш концепциясининг устувор вазифалари ҳамда мамлакатимиз қишлоқ хўжалиги соҳасидаги эҳтиёжларга алоҳида эътибор қаратилган.
Канада вазири Ўзбекистон томонидан аҳолининг озиқ-овқат хавфсизлигини таъминлаш борасида кўрилаётган чора-тадбирларни олқишлаган. Агросаноат комплексларини давлат томонидан қўллаб-қувватлашни давом эттириш, қулай ишбилармонлик муҳитини яратиш, суғориладиган ерларнинг мелиоратив ҳолатини янада яхшилаш, сув хўжалигига янги механизмлар ва рақамли технологияларни жорий этиш, шунингдек, ер ва сувдан фойдаланиш самарадорлиги кўрсаткичларини ошириш алоҳида қизиқиш уйғотган.
Шунингдек, Канада томони билан Британия Колумбияси провинциясига Ўзбекистондан вақтинчалик ва мавсумий ишчиларни жалб қилиш масалалари ҳам муҳокама қилинган. Қайд этилишича, Британия Колумбиясига ҳар йили 12 мингга яқин мавсумий меҳнат муҳожирлари, асосан, Мексика ва Лотин Америкасининг қатор мамлакатларидан провинциянинг қишлоқ хўжалиги соҳасида ишлаш учун 5-6 ой муддатга келади.
Маълум қилинишича, яқин кунларда Канада вазири Ўзбекистоннинг тегишли вазирлик ва идоралари вакиллари билан онлайн учрашув ўтказиб, қишлоқ хўжалиги соҳасида ўзаро ҳамкорлик қилиш ва Ўзбекистондан Британия Колумбиясига мавсумий ишчиларни жўнатиш истиқболларини муҳокама қилади.
Эслатиб ўтамиз, 31 май куни Ўзбекистон ташқи ишлар вазири вазифасини бажарувчи Владимир Норов Канаданинг мамлакатдаги фавқулодда ва мухтор элчиси (қароргоҳи Москва шаҳрида) Элисон Мери Леклер билан Тошкент шаҳрида Канада виза марказини очиш масаласини ўрганишга келишиб олганди.
Изоҳ (0)