Ўзбекистонда импорт ҳисобига аҳоли учун етказиладиган зарурий озиқ-овқатлар «биринчи қўл» тамойили асосида ўртакашларсиз бозорга чиқарилмоқда. Бу ҳақда Иқтисодий жиноятларга қарши курашиш департаменти бошлиғи Дилшод Раҳимов маълум қилди.
Раҳимовнинг сўзларига кўра, маҳсулотлар арзон ва таклиф юқори бўлган ҳудуддан нарх ошган ҳудудларга интервенсия қилиш, яъни маҳсулот миқдорини ошириш чоралари кўрилмоқда.
Сурхондарё вилоятидан республика ҳудудларига қарийб 6 минг тонна эртаки картошка ва 28 минг тонна янги пиёз ички ишлар органлари ходимлари билан ҳамкорликда бозорларга етказиб берилиши таъминланган.
Ҳозирги вақтда биргина Самарқанд ва Тошкент вилоятларида эртаки картошка ялпи ҳосилга кирган бўлиб, жорий ойнинг ўзида 475 минг тонна ҳосил ички бозорга кириб келиши кутилмоқда. Бу эса аҳоли эҳтиёжини қоплашга етади ҳамда картошка нархидаги тебранишларни бартараф этиш имконини беради.
«Қишлоқ хўжалиги маҳсулотларини ҳудудлар кесимида манзилли етказиб бериш тадбирлари давом эттирилмоқда ҳамда бу жараён доимий назоратга олинган», — дейди департамент бошлиғи.
Шунингдек, Раҳимовга кўра, айрим озиқ-овқат товарлари импорт ҳисобидан қондирилишини инобатга олган ҳолда, йирик импортёрлар томонидан маҳсулотларнинг мамлакатга келтирилиши ҳам қатъий назоратга олинган.
Ажратилган кредитлар ҳисобига жами 60 минг тонна картошка, 3 минг тонна гўшт, 1,7 минг тонна ўсимлик ёғи, минг тонна ун, 12,7 минг тонна шакар келтирилган.
«Ушбу маҳсулотлар ‘биринчи қўл’ тамойили асосида ўртакашларсиз деҳқон бозорларида сотилиши таъминланмоқда», — дея қайд этади Раҳимов.
Аввалроқ Ўзбекистонда биржа савдоларида уннинг сотилиши бўйича қандай вақтинчалик тартиблар ўрнатилгани маълум қилинганди.
Изоҳ (0)