Камбоджа ҳудудида Пекиннинг ҳарбий-денгиз базаси қурилмоқда, буни Хитой ва Камбоджа сир сақламоқда, деб ёзади «РБК». Бу ҳақда The Washington Post ғарблик бир нечта мансабдорларга таяниб маълум қилган.
Гап Камбоджа жануби-ғарбида, Siam кўрфази қирғоғида жойлашган Реам ҳарбий-денгиз базасининг шимолий қисмидаги объект ҳақида бормоқда. Шу ҳафта объект пойдевори қурилади.
WP манбалари айтишича, база Хитой учун иккинчи шундай объектга айланади: яна биттаси, Пекиннинг чет элдаги ҳозирча ягона ҳарбий базаси шарқий Африкадаги Жибутида жойлашган. Айнан Ҳинд-Тинч океани минтақасида база қуриш Хитой учун стратегик муҳим мақсад ҳисобланади, дея таъкидлади газета манбалари, чунки бу минтақа Пекинда «таъсир кўрсатиш учун қонуний ва тарихий ҳудуд» деб баҳоланади.
Хитой ва Камбожа ўртасида база қурилиши тўғрисида битим тузилгани ҳақида 2019 йилда Wall Street Journal америкалик мансабдорларга таяниб ёзганди. Томонлар келишув имзолангани ҳақидаги маълумотни сир сақлаган ва бундай битимлар ҳақидаги хабарларни рад этган. Аммо газетанинг Пекиндаги манбаси кейинроқ база қисман хитойлик ҳарбийлар томонидан ишлатилишини тасдиқлаган.
2021 йил декабрида АҚШ разведкасининг Хитой Атлантика океани соҳилида жойлашган Экваториал Гвинеяда ҳарбий база қуришни режалаштираётгани ҳақидаги махфий маълумотлари эълон қилинганди. АҚШ ҳукумати вакиллари разведка маълумотларини батафсил ошкор этмаган, бироқ ушбу ҳисобот Оқ уй ва Пентагонда катта хавотир уйғотган.
Хитой хориждаги биринчи базасини 2017 йилда Жибутида қурган — у АҚШнинг Африкадаги 4,5 минг ҳарбий хизматчиси жойлаштирилган Camp Lemonnier базаси яқинида. Шу билан бирга газетанинг таъкидлашича, сўнгги 20 йил ичида Хитой давлат компаниялари Африкада 100 та савдо портларини қурган. 2021 йилнинг баҳорида АҚШ разведкаси Хитой БААдаги савдо портида махфий ҳарбий база қураётганини аниқлаган. Оқибатда Вашингтон БАА ҳукуматини ушбу қурилишни вақтинча бўлса-да, тўхтатишга кўндирган. Бундан ташқари, Америка расмийлари Мавританиядаги маҳаллий ҳокимиятларга Пекин томонидан бу ерда қурилган портдан ҳарбий мақсадларда фойдаланишга уринишларига йўл қўймасликни тавсия қилгани маълум бўлган.
Пентагон томонидан 2021 йилда Конгрессга тайёрланган ҳисоботда келтирилишича, АҚШ Мудофаа вазирлиги Хитой Кения, Танзания, Ангола ва Сейшел оролларида ҳарбий базаларини қуриш истиқболларини кўриб чиқаётганини тахмин қилмоқда.
Изоҳ (0)