Kambodja hududida Pekinning harbiy-dengiz bazasi qurilmoqda, buni Xitoy va Kambodja sir saqlamoqda, deb yozadi “RBK”. Bu haqda The Washington Post g‘arblik bir nechta mansabdorlarga tayanib ma’lum qilgan.
Gap Kambodja janubi-g‘arbida, Siam ko‘rfazi qirg‘og‘ida joylashgan Ream harbiy-dengiz bazasining shimoliy qismidagi obyekt haqida bormoqda. Shu hafta obyekt poydevori quriladi.
WP manbalari aytishicha, baza Xitoy uchun ikkinchi shunday obyektga aylanadi: yana bittasi, Pekinning chet eldagi hozircha yagona harbiy bazasi sharqiy Afrikadagi Jibutida joylashgan. Aynan Hind-Tinch okeani mintaqasida baza qurish Xitoy uchun strategik muhim maqsad hisoblanadi, deya ta’kidladi gazeta manbalari, chunki bu mintaqa Pekinda “ta’sir ko‘rsatish uchun qonuniy va tarixiy hudud” deb baholanadi.
Xitoy va Kamboja o‘rtasida baza qurilishi to‘g‘risida bitim tuzilgani haqida 2019-yilda Wall Street Journal amerikalik mansabdorlarga tayanib yozgandi. Tomonlar kelishuv imzolangani haqidagi ma’lumotni sir saqlagan va bunday bitimlar haqidagi xabarlarni rad etgan. Ammo gazetaning Pekindagi manbasi keyinroq baza qisman xitoylik harbiylar tomonidan ishlatilishini tasdiqlagan.
2021-yil dekabrida AQSh razvedkasining Xitoy Atlantika okeani sohilida joylashgan Ekvatorial Gvineyada harbiy baza qurishni rejalashtirayotgani haqidagi maxfiy ma’lumotlari e’lon qilingandi. AQSh hukumati vakillari razvedka ma’lumotlarini batafsil oshkor etmagan, biroq ushbu hisobot Oq uy va Pentagonda katta xavotir uyg‘otgan.
Xitoy xorijdagi birinchi bazasini 2017-yilda Jibutida qurgan — u AQShning Afrikadagi 4,5 ming harbiy xizmatchisi joylashtirilgan Camp Lemonnier bazasi yaqinida. Shu bilan birga gazetaning ta’kidlashicha, so‘nggi 20 yil ichida Xitoy davlat kompaniyalari Afrikada 100 ta savdo portlarini qurgan. 2021-yilning bahorida AQSh razvedkasi Xitoy BAAdagi savdo portida maxfiy harbiy baza qurayotganini aniqlagan. Oqibatda Vashington BAA hukumatini ushbu qurilishni vaqtincha bo‘lsa-da, to‘xtatishga ko‘ndirgan. Bundan tashqari, Amerika rasmiylari Mavritaniyadagi mahalliy hokimiyatlarga Pekin tomonidan bu yerda qurilgan portdan harbiy maqsadlarda foydalanishga urinishlariga yo‘l qo‘ymaslikni tavsiya qilgani ma’lum bo‘lgan.
Pentagon tomonidan 2021-yilda Kongressga tayyorlangan hisobotda keltirilishicha, AQSh Mudofaa vazirligi Xitoy Keniya, Tanzaniya, Angola va Seyshel orollarida harbiy bazalarini qurish istiqbollarini ko‘rib chiqayotganini taxmin qilmoqda.
Izoh (0)