Украинада бизнесни ривожлантириш ва евроинтеграцияни тезлаштириш учун инглиз тилига иш юзасидан мулоқот тили мақомини бериш имконияти муҳокама қилинмоқда. Ушбу масала ҳукумат йиғилишида кўриб чиқилган, деб ёзади «Коммерсантъ» мамлакат бош вазири Денис Шмигалга таяниб.
Соҳага алоқадор вазирликларга таклифларни ишлаб чиқиш ва тегишли ҳужжатларни расмийлаштириш топширилган. «Инглиз тили бугунги кунда бутун цивилизациялашган дунёда ишбилармонлик бўйича мулоқотда қўлланилади, Украинада унга бундай мақомнинг берилиши бизнесни ривожлантириш, инвестицияларни жалб қилиш ва евроинтеграцияни тезлаштириш имконини беради», — деб ёзди Шмигал ўз Telegram-каналида.
2019 йилдан буён Украинада «Украин тилининг давлат тили сифатида мавжуд бўлишини таъминлаш тўғрисида»ги қонун амал қилиб келади. У украин тилининг шахсий мулоқот ва диний маросимлардан ташқари, ҳаётнинг деярли барча соҳаларида қўлланилишини кўзда тутади.
Аввалроқ Украинанинг Россия қўшинлари томонидан эгаллаб олинган Херсон вилоятида украин тили билан бир қаторда рус тили ҳам давлат тили мақомини олиши маълум қилинганди.
Изоҳ (0)