Тошкентда ерусти ҳалқа метросининг охирги бекатлари ва Сергели линияси ўртасида бепул электробус қатновлари йўлга қўйилади. Бу ҳақда «Ўзбекистон 24» телеканали орқали эфирга узатилган лавҳада маълум қилинди.
12-бекат (ерусти метросининг сўнгги бекати, «Қурувчи» массиви) ва 5-бекат (Сергели ерусти метро тармоғининг сўнгги бекати, «Қипчоқ») ўртасида электробуслар қатнови йўлга қўйилади.
«12-бекат ва ‘Қипчоқ’ бекати ўртасида махсус шаттл-баслар қатнайди. Бу бепул электробус бўлади. Метрополитен йўловчилари охирги бекатдан чиқиб, Сергели тармоғининг охирги бекатига бепул етиб олиши мумкин», — дейди Транспорт вазирлиги бош бошармаси бошлиғи Анвар Жўраев.
Жўраевнинг сўзларига кўра, «Роҳат» бекатида транспорт-ўтувчи узел ташкил этилади ва бу Тошкент вилояти туманлари аҳолисига метрога ўтиш имконини беради.
Шунингдек, у ер усти ҳалқа метросини қуришнинг иккинчи босқич лойиҳаси доирасида пойтахт меҳмонлари учун олтита автотураргоҳни қуриш режалаштирилганини маълум қилган. Бу уларга шахсий автомобилини қолдириб, метродан фойдаланиш имконини беради.
Шавкат Мирзиёев 6 июнь куни Тошкент ерусти ҳалқа метросининг иккинчи босқичи қурилишини бориб кўрганди. Қайд этилишича, 2020 йилда Тошкент ерусти ҳалқа метросининг «Дўстлик-2» бекатидан «Қўйлиқ» бекатигача бўлган биринчи босқичи қурилган. Бугунги кунда Қўйлиқдан Сергели йўналишининг 5-бекатига элтувчи иккинчи босқич барпо этилмоқда. Ҳозирги кунгача 200 дан зиёд таянч устунлар ўрнатилиб, эстакадалар қурилмоқда.
Изоҳ (0)