Toshkentda yerusti halqa metrosining oxirgi bekatlari va Sergeli liniyasi o‘rtasida bepul elektrobus qatnovlari yo‘lga qo‘yiladi. Bu haqda “O‘zbekiston 24” telekanali orqali efirga uzatilgan lavhada ma’lum qilindi.
12-bekat (yerusti metrosining so‘nggi bekati, “Quruvchi” massivi) va 5-bekat (Sergeli yerusti metro tarmog‘ining so‘nggi bekati, “Qipchoq”) o‘rtasida elektrobuslar qatnovi yo‘lga qo‘yiladi.
“12-bekat va ‘Qipchoq’ bekati o‘rtasida maxsus shattl-baslar qatnaydi. Bu bepul elektrobus bo‘ladi. Metropoliten yo‘lovchilari oxirgi bekatdan chiqib, Sergeli tarmog‘ining oxirgi bekatiga bepul yetib olishi mumkin”, — deydi Transport vazirligi bosh bosharmasi boshlig‘i Anvar Jo‘rayev.
Jo‘rayevning so‘zlariga ko‘ra, “Rohat” bekatida transport-o‘tuvchi uzel tashkil etiladi va bu Toshkent viloyati tumanlari aholisiga metroga o‘tish imkonini beradi.
Shuningdek, u yer usti halqa metrosini qurishning ikkinchi bosqich loyihasi doirasida poytaxt mehmonlari uchun oltita avtoturargohni qurish rejalashtirilganini ma’lum qilgan. Bu ularga shaxsiy avtomobilini qoldirib, metrodan foydalanish imkonini beradi.
Shavkat Mirziyoyev 6-iyun kuni Toshkent yerusti halqa metrosining ikkinchi bosqichi qurilishini borib ko‘rgandi. Qayd etilishicha, 2020-yilda Toshkent yerusti halqa metrosining “Do‘stlik-2” bekatidan “Qo‘yliq” bekatigacha bo‘lgan birinchi bosqichi qurilgan. Bugungi kunda Qo‘yliqdan Sergeli yo‘nalishining 5-bekatiga eltuvchi ikkinchi bosqich barpo etilmoqda. Hozirgi kungacha 200 dan ziyod tayanch ustunlar o‘rnatilib, estakadalar qurilmoqda.
Izoh (0)