Тошкент вилоятининг Оҳангарон туманида ЙҲХБ инспектори томонидан машинаси жарима майдонига олиб кетилаётган вақтда ҳайдовчи автомобилдан ўзини ташлаб юбориб, вафот этгани тўғрисида хабар берилганди. Бош прокуратура матбуот котибининг маълум қилишича, ҳолат марҳумнинг ўлими сабабларини аниқлаш мақсадида судга оид тиббий экспертиза тайинланган.
Таъкидланишича, ҳозирда Оҳангарон туманида ЙҲХБ инспекторлари ва ҳайдовчи ўртасидаги вазият ҳамда ҳайдовчининг ўлими билан боғлиқ ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
Марҳумнинг ўлими сабабларини аниқлаш мақсадида судга оид тиббий экспертиза тайинланган.
«Ҳолатга аниқлик киритиш учун ЙҲХБ ходимларига бириктирилган бодикамерада акс эттирилган видеотасвирлар олинган. ЙХҲБ ходимларининг хатти-ҳаракатлари юзасидан хизмат текшируви тайинланган. Мазкур ҳолат ҳар томонлама, тўла ва холисона текшириб чиқилади ва натижаси ҳақида қўшимча хабар қилинади», — дейилади муносабатда.
Аввалроқ Самарқандда чет эл фуқароларига электрошокер қўллаш билан боғлиқ воқеадан сўнг 4 нафар ходим тизимдан бўшатилгани, Андижонда уч нафар шахс ЙПХ ходими билан жанжаллашиб, рацияси, нишони ва планшетини олиб қўйгани, Чироқчида ЙПХ ходимларига қаршилик кўрсатган шахслар ҳибсга олингани тўғрисида хабар берилганди.
Изоҳ (0)