Buxoroda 2 nafar farzandi ta’minoti uchun 81 million 766 ming so‘m miqdoridagi aliment qarzdorligini to‘lashdan bo‘yin tovlab kelgan fuqaro 15 sutkaga qamaldi. Bu haqda “Daryo”ga viloyat MIB matbuot xizmati rahbari Ixtiyor Olimov xabar berdi.
Ta’kidlanishicha, byuroning Qorako‘l tumani ish yurituviga undiruvchi D.X. tomonidan ikki nafar farzandi ta’minoti uchun qarzdor N.S.ning aliment to‘lovini amalga oshirmay kelayotgani yuzasidan murojaat kelib tushgan. Ijro harakatlari davomida qarzdor N.S. ijro hujjatlari talablarini bajarmay, yashirinib yurgan. Shundan so‘ng 2020-yilning fevral oyida N.S.ga nisbatan qidiruv e’lon qilingan.
Olib borilgan qidiruv tadbirlari natijasida qarzdor N.S.ning Toshkent viloyatidagi yaqin qarindoshining uyida ishlab, yashab yurgani aniqlangan va qo‘lga olingan.
N.S.ning aliment qarzdorligi qayta hisoblanganda, 81 million 766 ming so‘mni tashkil etgan. O‘z vaqtida qarzini to‘lamay, yashirinib yurgani sababli unga nisbatan Ma’muriy javobgarlik to‘g‘risidagi kodeksning 471-moddasi (ota-ona qaramog‘idan mahrum bo‘lgan bolalar to‘g‘risidagi ma’lumotlarni vasiylik va homiylik organiga xabar qilmaslik) bilan ma’muriy bayonnoma rasmiylashtirilgan va to‘plangan hujjatlar Jinoyat ishlari bo‘yicha Qorako‘l tumani sudiga yuborilgan.
Ikki yil davomida aliment to‘lovidan bo‘yin tovlab, yashirinib yurgan fuqaro 26-may kuni 15 sutkaga qamalgan. “15 sutka ma’muriy qamoq jazosi fuqaroni aliment qarzdorligini to‘lashdan ozod etmaydi”, — dedi Ixtiyor Olimov.
Izoh (0)