Шавкат Мирзиёев 6 июнь куни Қозоғистон президенти Қосим-Жўмарт Тўқаев билан телефон орқали мулоқот қилди. Бу ҳақда Президент матбуот хизмати хабар қилди.
Қайд этилишича, давлат раҳбари Қозоғистон президентини мамлакат конституциясига ўзгартириш ва қўшимчалар киритиш бўйича умуммиллий референдум муваффақиятли ўтказилгани билан қутлаган. Мулоқотда Ўзбекистон ва Қозоғистон ўртасидаги стратегик шериклик ва иттифоқчилик муносабатларини мустаҳкамлашнинг долзарб масалалари кўриб чиқилган. Минтақавий кун тартиби юзасидан фикр алмашилган.
Олий даражада эришилган икки томонлама савдо-иқтисодий, инвестициявий, транспорт-коммуникациявий, фан-таълим ва маданий-гуманитар ҳамкорлик лойиҳаларини илгари суриш бўйича келишувларни амалга оширишга алоҳида эътибор қаратилган.
Бундан ташқари, минтақавий ҳамкорлик, халқаро ташкилотлар доирасидаги яқин ва самарали мулоқотни давом эттириш истиқболлари муҳокама қилинган.
Эслатиб ўтамиз, референдум кеча, 5 июнь куни бўлиб ўтди. Тузатишлар орқали давлат раҳбари ваколатларини қисқартириш таклиф этилмоқда. Шунингдек, конституциядан мамлакат биринчи президенти Нурсултон Назарбоевнинг алоҳида мақоми ҳақидаги қайдлар олиб ташланади. Амалдаги президент Қосим-Жўмарт Тўқаев ваъда қилганидек, ўзгаришларнинг барчаси «чекловлар ва қаршиликлар тизимини мустаҳкамлаш»га қаратилган.
Изоҳ (0)