Қозоғистонда конституцияни ўзгартириш бўйича референдум ўтказилмоқда. Унда Тўқаев ҳам ўз овозини берди

Қозоғистонда бугун, 5 июнь куни мамлакат конституциясига ўзгартиришлар киритиш бўйича референдум ўтказилмоқда.

Қозоғистон Марказий сайлов комиссияси хабарига кўра,  жами 10 мингдан ортиқ сайлов участкаси очилган. Улардан 65 таси 52 та хорижий давлатда ташкил этилган. Референдумда 11,7 миллион киши овоз бериши мумкин.

Фуқаролардан «2022 йил 6 майда оммавий ахборот воситаларида эълон қилинган ‘Қозоғистон Республикаси конституциясига ўзгартиш ва қўшимчалар киритиш тўғрисида’ги қонун лойиҳасида назарда тутилган Қозоғистон Республикаси конституциясига киритилган ўзгартириш ва қўшимчаларни қабул қиласизми?» деган саволга жавоб бериш сўралади.

Тузатишлар давлат раҳбарининг ваколатларини қисқартиришни таклиф қилади. Президентнинг яқин қариндошларига давлат лавозимларида ишлаш тақиқланади. Мамлакатнинг биринчи президенти Нурсултон Назарбоевнинг алоҳида мақомига оид барча бандлар конституциядан олиб ташланади.

Референдумда Қозоғистон президенти Қосим-Жўмарт Тўқаев ҳам конституциясига ўзгартириш ва қўшимчалар киритиш учун ўз овозини берди.

«Давлат раҳбари Қосим-Жўмарт Тўқаев конституцияга ўзгартиришлар киритиш бўйича референдумда овоз берди. Давлат раҳбари пойтахтдаги Ўқувчилар саройида жойлашган 59-сайлов участкасида овоз берди», — дейилади референдум ҳақида расмий маълумот берувчи Telegram-каналда эълон қилинган хабарда.

Референдумни ҳақиқий деб тан олиш учун унда сайловчиларнинг 50 фоиздан ортиғи иштирок этиши керак. Асосий қонунга киритилган ўзгартишлар вилоятлар, республика аҳамиятига молик шаҳарлар ва пойтахтнинг камида учдан икки қисмида, яъни 17 та вилоятдан 12 тасида фуқароларнинг ярмидан кўпи овоз берган бўлса, қабул қилинган ҳисобланади. Сайлов участкалари 20:00 да (Тошкент вақти билан 19:00) ёпилади.

Тўқаев апрель ойида Қозоғистон конституциясига ўзгартиришлар киритиш бўйича референдум ўтказилишини эълон қилганди. Ўзгартиришлар мамлакат бош қонунининг 30 дан ортиқ моддаларига тааллуқли бўлади.