Тошкент шаҳрида содир бўлган йўл-транспорт ҳодисаси оқибатида ҳайдовчи ҳалок бўлди, деб хабар беради пойтахт ИИББ ахборот хизмати.
Маълум қилинишича, 4 июнь куни соат 00:25 ларда Мирзо Улуғбек тумани, Оққўрғон кўчасида Lacetti русумли автомашинани бошқариб кетаётган 21 ёшли С.Н. бошқарувни йўқотиб, йўлни ўртасидаги ёритиш устунига урилган.
ЙТҲ оқибатида Lacetti русумли автомашина ҳайдовчиси тан жароҳати олиб, шифохонага ётқизилган, бироқ тиббиёт ходимларининг уринишларига қарамай, у жонлантириш бўлимида вафот этган.
Мазкур ҳолат юзасидан Тошкент шаҳар ИИББ томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган. Ҳозирда тергов ҳаракатлари олиб борилмоқда.
Аввалроқ Жиззахда катта тезликда ҳаракатланган Lacetti автомобили Nexia-3 ва Damas билан тўқнашгани, Тошкентда «Газель» «пешеход»дан ўтаётган пиёдани уриб юборгани, Тошкентда тезликни оширган Cobalt йўл четидаги бетон устунга бориб урилгани тўғрисида хабар берилганди.
Изоҳ (0)