Сурхондарё вилоятининг Жарқўрғон туманида ноқонуний ер олди-сотдиси билан боғлиқ ҳолатга чек қўйилди, деб хабар беради вилоят ИИБ ахборот хизмати.
Маълум қилинишича, 18 май куни Қумқўрғон туманида яшовчи Б.С. вилоят ИИБга ёзган аризасига асосан Жиноят-қидирув бошқармаси Коррупция ва иқтисодий жиноятларга қарши курашиш бўлими ходимлари томонидан тезкор тадбир ўтказилган.
Термиз шаҳар «Алпомиш» маҳалласида жойлашган ресторанларнинг бирида ўтказилган тезкор тадбир давомида Жарқўрғон туманида яшовчи Х.И. туман ҳудудида жойлашган ўзига тегишли бўлмаган 50 сотих ер майдонини жами 500 миллион сўмга сотмоқчи экани аниқланган. У фуқаро Б.С.дан 214 миллион сўм пулларни олган вақтида ашёвий далиллар билан қўлга олинган.
Фуқаро Х.И.га нисбатан Жиноят кодексининг 168-моддаси (фирибгарлик) 4-қисми «а» банди билан жиноят иши қўзғатилган.
Аввалроқ Самарқандда ҳокимият захирасидаги ерни 65 минг долларга сотишга уринган шахслар ушлангани, Самарқандда туман ҳокимининг сохта қарори билан қарийб 20 минг долларга ер сотган хўжалик раҳбари аниқлангани, Давлат кадастрлари палатаси Нуробод туман филиали мутахассислари 2 млн сўм пора билан ушлангани тўғрисида хабар берилганди.
Изоҳ (0)