Британия қироличаси Елизавета II бугун, 3 июнь куни ўз ҳукмронлигининг 70 йиллиги муносабати билан Авлиё Пол соборида ўтказиладиган маросимда қатнашмайди. 96 ёшли қиролича ҳаракатланишда муаммоларга дуч келмоқда, деб хабар берди Reuters.
Черковдаги маросимда қатнашмаслик тўғрисидаги қарор қиролича 2 июнь куни ҳарбий парадда қатнашиб, бироз ноқулайлик ҳис қилганидан сўнг «қийинчилик билан» қабул қилинди, деди Букингем саройи. Қироллик оиласига яқин BBC журналисти Шон Кафланнинг айтишича, черковдаги маросимда иштирок этиш қиролича учун диндор шахс сифатида бошқа тадбирларга қараганда муҳимроқ эди.
2 июнь куни Лондонда қиролича тахтга ўтирганининг 70 йиллиги шарафига тантанали парад бўлиб ўтди. Тадбирда қироллик қуролли кучларининг турли бўлинмаларидан 1,5 мингдан ортиқ аскар ва 400 нафар мусиқачи иштирок этди.
2—5 июнь кунлари Буюк Британияда қиролича Елизавета II нинг платина юбилейи нишонланади. У Британия тарихидаги энг узоқ ҳукмронлик қилган монархдир.
Эслатиб ўтамиз, Елизавета II 10 май куни парламентнинг очилиш маросимини ўтказиб юборганди. «Қиролича ҳаракатланишда кичик муаммоларни бошдан кечирмоқда», — деган Букингем саройи ўша пайтдаги баёнотида. У февраль ойида COVID-19 билан касалланган.
Изоҳ (0)