АОКАда «Маймунчечак касаллигига қарши кўрилаётган эпидемиологик чора-тадбирлар» мавзусида матбуот анжумани ўтказилди. Унда шу кунларда дунёнинг қатор давлатларида тарқалаётган маймун чечаги инфекцияси хусусида Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков бир қатор маълумотлар берди, деб хабар қилди Санитария-эпидемиология хизмати.
«Жаҳон соғлиқни сақлаш ташкилотининг маълумотларига кўра, ушбу маймун чечаги вируси аввалдан фанга маълум вирус ҳисобланади, ҳар йили Африка давлатларида қайд этилиб бориладиган касаллик бўлиб, пандемия ҳолатини юзага келтириш хавфи пастлиги таъкидланмоқда. Шунингдек, маймун чечаги вируси ДНК тутувчи бўлиб, мутацияга учрамайди. Ушбу касаллик 2003 йилда АҚШ, 2017—2019 йилларда Нигерия, 2018 йилда Буюк Британияда қайд этилган, ўлим ҳолати жуда кам учраган», — дейди Нурмат Отабеков.
Унинг қайд этишича, маймун чечаги касаллиги табиий ўчоқли, зооноз касаллик бўлиб, Марказий ва Ғарбий Африканинг айрим ҳудудларига хос ҳисобланади. Олинган маълумотларга кўра, касаллик биринчи навбатда Африканинг эпидемик нохуш бўлган ҳудудларига борган фуқаролар ўртасида қайд этилиб, кейинчалик бемор одамдан соғлом одамга юқиш ҳолатлари аниқланган.
«Касалликни Ўзбекистонга кириб келиши эҳтимоли мавжуд, бироқ маймун чечаги касаллиги қайд қилинган Европа мамлакатларида беморларни мулоқотдагиларига нисбатан алоҳидалаш чоралари олиб борилаётгани, мамлакатимиз катта ёшдаги (1980 йилдан аввал туғилган аҳоли) аҳолиси чечакка қарши режали эмлашни олгани сабабли кенг тарқалиш хавфи паст даражада деб баҳоланмоқда», — деган Санитария-эпидемиологик осойишталик ва жамоат саломатлиги хизмати бошлиғи ўринбосари.
Нурмат Отабеков 23 май куни Ўзбекистонда маймунчечак қайд этилмагани ҳақида айтиб ўтганди. «Айни пайтда ЖССТ тавсияларидан келиб чиқиб бу инфекциянинг юртимизга кириб келмаслиги учун зарур чораларни кўряпмиз», — деганди у.
Изоҳ (0)