Бош вазирининг ўринбосари — инвестициялар ва ташқи савдо вазири Сардор Умрзоқов раҳбарлигида видеоконференция тарзида мамлакатнинг инвестициявий ва ташқи савдо фаолиятининг жорий кўрсаткичлари ҳамда уларни ошириш бўйича навбатдаги чора-тадбирларни муҳокама қилишга бағишланган йиғилиш бўлиб ўтди. Бу ҳақда Инвестициялар ва ташқи савдо вазирлиги матбуот хизмати хабар берди.
Йиғилишда 2022 йилнинг дастлабки 5 ойи якунлари бўйича ўзлаштирилган хорижий инвестициялар ҳажми ўтган йилнинг шу давридаги кўрсаткичлардан 42 фоизга ошгани маълум қилинган. Шу билан бирга, ўтказилган таҳлил айрим тармоқ ва ҳудудларда инвестиция лойиҳаларини ҳаётга жорий этиш билан боғлиқ бир қатор муаммолар мавжудлигини кўрсатган.
Йиғилиш якунлари бўйича экспортчи ва инвесторларни қўллаб-қувватлашда йўл қўйилган қолоқлик ва камчиликлар учун интизомий чоралар кўрилган.
Хусусан, Бўзатов тумани ва Зарафшон шаҳри ҳокимларининг инвестициялар ва ташқи савдо масалалари бўйича ўринбосарлари ўз лавозимларидан озод этилган. Инвестиция лойиҳалари ташаббускорларини ўз вақтида қўллаб-қувватламагани натижасида 32 та инвестиция лойиҳаси муддатида ишга туширилмагани ҳамда 395 та янги иш ўринлари кечиктириб яратилгани учун 19 нафар ҳоким ўринбосарига ҳайфсан эълон қилинган.
Қўйилган вазифаларни сифатли ва ўз вақтида бажариш юзасидан қўшимча кўрсатмалар берилган. Масъул раҳбарлар экспортёр ва инвесторларни ўз вақтида қўллаб-қувватлаш бўйича олиб борилаётган ишларининг самарадорлиги учун шахсан жавобгар экани тўғрисида огоҳлантирилган.
Аввалроқ Қорақалпоғистон транспорт вазирига ҳайфсан, инвестициялар ва ташқи савдо вазирига эса қатъий огоҳлантириш берилганди.
Изоҳ (0)