Bosh prokuratura “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini muhokamaga qo‘ydi.
Qonun loyihasi bilan Ma’muriy javobgarlik to‘g‘risidagi kodeks tibbiyot xodimi faoliyatiga qonunga xilof ravishda aralashganlik, ya’ni tibbiyot xodimi tibbiy yordam yoki tibbiy xizmat ko‘rsatishiga to‘sqinlik qilganlik, shuningdek, tibbiyot xodimi tibbiy yordam yoki tibbiy xizmat ko‘rsatishiga to‘sqinlik qilish maqsadida unga noqonuniy topshiriqlar berganlik uchun javobgarlikni nazarda tutuvchi yangi 197-7-modda bilan to‘ldirilmoqda.
Bu fuqarolarga bazaviy hisoblash miqdorining besh baravaridan yetti baravarigacha (2,1 million so‘mgacha), mansabdor shaxslarga esa — yetti baravaridan o‘n baravarigacha (3 million so‘mgacha) miqdorda jarima solishga yoki o‘n besh sutkagacha muddatga ma’muriy qamoqqa olishga sabab bo‘ladi.
Shuningdek, Jinoyat kodeksi 277-moddasi uchinchi qismi “g” bandiga o‘zgartirish kiritilib, bezorilik jinoyati o‘z xizmat yoki fuqarolik burchini bajarishi munosabati bilan shaxsga yoki uning yaqin qarindoshlariga nisbatan sodir etilishi uch yildan besh yilgacha ozodlikdan mahrum qilish jazosi tayinlanishiga olib kelishi ko‘rsatilib, buning natijasida tibbiyot xodimlariga bezorilik oqibatida tajovuz qilganlik uchun javobgarlik og‘irlashtirilmoqda.
Avvalroq 1-iyundan tibbiyot xodimlarining ish haqi ikki marta oshirilishi, O‘zbekistondagi barcha tibbiyot xodimlari dastlabki va davriy tibbiy ko‘rikdan bepul o‘tkazilishi, mamlakatda tibbiyot xodimlariga 100 foizgacha maxsus oylik ustamalar to‘lanishi to‘g‘risida xabar berilgandi.
Izoh (0)