Андижон вилоятининг Балиқчи туманидаги 6-умумтаълим мактаби директори ўзи раҳбарлик қилаётган мактабни таъмирлаган қурувчидан 4500 доллар пора олаётганда ушланди, деб хабар бермоқда «Дарё» мухбири.
Аниқланишича, 2021 йилда «Обод қишлоқ» давлат дастури асосида мазкур мактабда капитал таъмирлаш ишларини олиб борган қурилиш ташкилоти раҳбаридан қурилишни қабул қилиш ва топширишга тайёрлаш далолатномаларига имзо қўйиб, бинони фойдаланишга қабул қилиб олиш эвазига капитал қурилиш учун бюджет маблағларидан ажратилган 4,9 миллиард сўмнинг 1 фоизини, яъни 4500 долларни беришни талаб қилган.
Қурувчи директорга маблағни бераётган вақтида ДХХ ҳамда Иқтисодий жиноятларга қарши курашиш департаментнинг ҳудудий бошқармалари билан ҳамкорликда ўтказилган тезкор тадбирда ушланган.
Ҳозирда мактаб директорига нисбатан Жиноят кодексининг 210-моддаси 2-қисми, «в» банди (тамагирлик йўли билан пора олиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)