АҚШ Халқаро тараққиёт агентлиги (USAID) Ўзбекистондаги қишлоқ аёллари иқтисодий имкониятларини кенгайтириши учун қўшимча равишда 2,4 миллион доллар ажратади. Бу ҳақда «Дунё» агентлиги хабар берди.
Қишлоқ хўжалиги вазирлиги маълумотига кўра, бу ҳақда USAID’нинг Осиё бюроси маъмурияти ёрдамчиси ўринбосари Анжали Каур билан музокаралар чоғида маълум қилинган.
Учрашув чоғида томонлар USAID ва вазирлик ўртасида «Агробизнесни ривожлантириш» қўшма лойиҳаси доирасида боғдорчилик, қўшилган қийматли маҳсулотларни ишлаб чиқариш, аёлларнинг иқтисодий ҳуқуқ ва имкониятларини кенгайтириш каби йўналишларда ҳамкорликни янада мустаҳкамлаш масалаларини муҳокама қилган.
«USAID жорий йил ёзида Ўзбекистон қишлоқ аёллари иқтисодий имкониятларини кенгайтириши учун қўшимча равишда 2,4 миллион доллар ажратишини эълон қилишдан жуда мамнунман. Ушбу маблағлар Ўзбекистон, айниқса, Оролбўйи ҳудудидаги қишлоқ аёлларини қўллаб-қувватлаш, уларга тадбиркорлик кўникмаларини ўргатиш, касб-ҳунар бериш, микромолиялаштириш, мураббийлик ва бандлик дастурларини амалга ошириш учун йўналтирилади», — дейди Анжали Каур.
Бундан олдин USAID Ўзбекистонга коронавирусга қарши курашиш учун қўшимча 2,5 миллион доллар ажратган. Шунингдек, мактабларига қиймати 10 миллион долларлик 385 мингта китоб тақдим этган ва Соғлиқни сақлаш вазирлигига сил касаллигини аниқлаш учун 30 та GeneXpert ускунасини совға қилган.
Изоҳ (0)