1 июндан бошлаб Тошкентдаги дўконларда «буханка» нонларни 2 800 сўмдан сотиш бошлангани тўғрисида хабар берилганди. Монополияга қарши курашиш қўмитасига кўра қолипли нон нархи ошгани бўйича тезкор ўрганишлар ўтказилган.
Ўрганишлар давомида аниқланишича, «буханка» нон нархи Тошкент шаҳрида энг юқори — 2800 сўм, Қашқадарёда вилоятида энг паст — 1650 сўм, республика бўйича ўртача нарх эса 2250 сўмни ташкил этмоқда.
Шунингдек, таъкидланишича, ун маҳсулоти 2022 йил июнь ойидан бошлаб биржа савдоларига етарли миқдорда қўйилмоқда ва бу жараён устидан доимий назорат ўрнатилган. Республикада ун маҳсулоти захираси шакллантирилган бўлиб, нарх-наволарнинг кескин ошиб кетмаслиги учун зарур миқдорда ун савдоларга қўйиб борилади.
Хусусан, июнь ойида 170 минг тонна ун биржага қўйилиши, бунда ҳар бир нон ишлаб чиқарувчи учун тенг шароит яратиш мақсадида кичик лотларда (3 тоннадан) қўйилмоқда. 1 июнь ҳолатида 50,5 минг тоннадан ортиқ ун маҳсулоти қолдиғи мавжуд бўлиб, август ойигача ун ишлаб чиқариш учун корхоналарда зарур дон қолдиғи мавжуд.
«Шу ўринда айтиб ўтиш лозимки, ун маҳсулоти реализация қилинишининг бозор тамойилларига асосланган механизми жорий қилиниши, биринчи навбатда буғдой етиштирувчи фермер ва деҳқонлардан тортиб, ишлаб чиқарувчи ва истеъмолчилар манфаатини кўзлаб қилинган қадам бўлиб, ушбу жараёнда шаффоф тизим яратилиши билан бирга, республиканинг энг чекка ҳудудларига ҳам маҳсулотнинг етиб борилиши назоратга олинган», — дейилади муносабатда.
Қўмита нон ишлаб чиқарувчи ва сотувчилар ҳамда аҳолидан бу борада хавотирга тушмасликни, ижтимоий тармоқлар орқали тарқатилаётган асосланманган маълумотларга ишониб, сунъий ажиотаж вужудга келтирмасликларини сўраган. Бозорда сунъий танқислик юзага келиши ва нархларнинг кескин ошиб кетиш ҳолатларини кузатганда, Монополияга қарши курашиш қўмитасининг ишонч телефонига (71-207-47-00), қўмита ҳузуридаги Истеъмолчилар ҳуқуқини ҳимоя қилиш агентлиги Call-марказига (1159 қисқа рақам) ёки қўмитанинг матбуот хизматига (71-207-47-00 (ички 224) мурожаат қилиш мумкин.
Аввалроқ «Ғаллани етиштириш ва сотишда бозор тамойилини жорий этишнинг қўшимча чора-тадбирлари тўғрисида»ги президент қарори қабул қилинганди. Молия вазирлиги департаменти мудири Тўлқин Мирзаев эса истеъмол бозорида сотилаётган ёпган нонлар импорт ундан ёпилгани учун қимматлашаётганини маълум қилган эди.
Изоҳ (0)