Тошкент шаҳри Сергели туманида 31 май куни цехда ёнғин содир бўлди. Бу ҳақда Фавқулодда вазиятлар вазирлиги хабар қилди.
Қайд этилишича, соат 18:11 да Сергели тумани Нилуфар кўчасида жойлашган цехда ёнғин содир бўлаётгани тўғрисида шаҳар ФВБга хабар келиб тушган. Шунга кўра, 6 та ёнғин-қутқарув экипажи, 2 та махсус техника воқеа жойига етиб борган.
Ёнғин соат 18:28 да қуршаб олиниб, соат 18:51 тўлиқ бартараф этилган.
Ёнғин оқибатида бинонинг сендвич панелли том ёпмасининг тахминан 300 квадрат/метр майдони ёниб зарарланган. Ҳодисада тан жароҳати олган ва ҳалок бўлганлар йўқ. Ёнғиндан бинодаги маҳсулотлари сақлаб қолинган.
Айни вақтда ёнғиннинг келиб чиқиш сабаби ва келтирилган моддий зарар миқдори аниқланмоқда.