Жиззахда мактабда ўқийдиган қизлар бошқа бир қизни «самосуд» қилгани тўғрисида хабар берилганди. «Миллий» телеканалининг «Миллар» информацион дастурида маълум қилинишича, ўқувчиларнинг ота-оналари жавобгарликка тортилган.
Ижтимоий тармоқларда тарқалган видеода бир нечта ўқувчи қизлар бошқа бир қизни ўртага олиб, кечирим сўрашга мажбурлагани тасвирланган. Ўрганишлар давомида ушбу ҳолат ҳафтанинг якшанба куни содир этилгани маълум бўлган. Мазкур жанжалда ўрта махсус таълим касб-ҳунар бошқармасига қарашли касб-ҳунар мактабидан бир нафар вояга етмаган шахс, бешта мактабнинг 6 нафар ўқувчиси ҳамда икки нафар вояга етган шахслар иштирок этган.
Аниқланишича, жанжалга Instagram’даги ўзаро ҳақоратли ёзишмалар сабаб бўлган. ХТВ вакилининг сўзларига кўра, ушбу жараёнда иштирок этган ўқувчиларнинг ота-оналари Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) билан жавобгарликка тортилган.
Аввалроқ Қорақалпоғистонда бир гуруҳ аёллар бошқа бир аёлни «самосуд» қилгани, Сурхондарёда кундошини «самосуд» қилган аёл ва унинг опаси қамалгани тўғрисида хабар берилганди.
Изоҳ (0)