Ўзбекистонда йилнинг 1-чорагида 22 та давлат ташкилотларида жами 81,5 млрд сўмлик молиявий хато ва камчиликлар аниқланди

Конрад Аденаур жамғармасининг Марказий Осиё ваколатхонаси кўмагида «Коррупцияга қарши курашиш ишларининг самарадорлигини рейтинг баҳолаш тизимини жорий этиш» мавзусидаги семинар тренингнинг навбатдаги қисми ташкил этилди. Бу ҳақда Коррупцияга қарши курашиш агентлиги «Дарё»га маълум қилди.

Қайд этилишича, тренинг дастлаб 28—29 март кунлари ўтказилган. Ҳозирги тадбир мазкур тренингнинг давоми ҳисобланади. Унда вазирлик ва идоралар, маҳаллий ҳокимликлар коррупцияга қарши ички назорат тузилмаларининг 220 нафардан ортиқ раҳбар ва ходимлари иштирок этган.

Ҳозирги вақтда жами 111 та давлат ва хўжалик бошқаруви органлари, давлат корхоналари ва устав капиталида давлат улуши бўлган корхоналар, шу жумладан, банкларда коррупцияга қарши ички назорат тузилмалари фаолияти йўлга қўйилган. Жорий йилнинг 1-чорагида коррупцияга қарши ички назорат тузилмалари томонидан 22 та давлат ташкилотлари ва идораларида жами 81 миллиард 561,1 миллион сўмлик молиявий хато ва камчиликлар аниқланган.

Тренинг коррупцияга қарши ички назорат тузилмалари фаолиятининг самарадорлигини ошириш, коррупциявий хавф-хатарларни баҳолаш билан боғлиқ масалалар юзасидан фикр алмашиш мақсадида ташкил этилган. Унда мутахассислар томонидан давлат ташкилотлари фаолиятида коррупциявий хавф-хатарларни тўғри баҳолаш, манфаатлар тўқнашувини аниқлаш ва бошқариш, давлат харидлари жараёнларида контрагентларни текшириш, коррупциявий хатти-ҳаракатлар юзасидан хизмат текшируви ўтказиш, коррупцияга қарши курашиш ишларининг самарадорлигини рейтинг баҳолаш тизими мавзуларида тақдимотлар ўтказилган.

Жорий йилнинг 1-чорагида коррупцияга қарши ички назорат тузилмалари томонидан 22 та давлат ташкилотлари ва идораларида жами 81 миллиард 561,1 миллион сўмлик молиявий хато ва камчиликлар аниқланган.

Аввалроқ Андижон ўтган 3 ойда коррупцион жиноятлар энг кўп содир этилган вилоят бўлгани, Антикоррупция агентлиги очиқликка оид қонунчилик талабларига риоя этмаган 8 та маҳаллий ҳокимликка огоҳлантириш юборгани, Ўзбекистонда 1 сентябрдан «E-antikorrupsiya» лойиҳаси ишга туширилиши тўғрисида хабар берилганди.