Тошкент шаҳрида «Банклар ва ритейл. Рақамли трансформация ва ўзаро ҳамкорлик» 2-халқаро PLAS-форуми бўлиб ўтди. Тадбирда 21 давлатдан 1 минг 200 нафар мутахассис иштирок этди. «Дарё» мухбири форум иштирокчиларидан интервью олди.
KPMG компаниясининг Ўзбекистондаги вакили, маслаҳат хизмати раҳбари Фарруҳ Абдуллахонов форумнинг аҳамияти ҳақида гапирди.
«Форум иштирокчилари Ўзбекистон банк тизимини янада ривожлантириш вазифалари билан боғлиқ хавфларни фаол муҳокама қилди. Шу билан бирга, форумда тижорат банкларини хусусийлаштириш ва рақамлаштириш, тўлов тизимларини ривожлантириш, янги технологиялар самарадорлигини ошириш масалалари ҳақида сўз борди. Айтишим мумкинки, бизнинг жамоа ҳам республикадаги тижорат банклари фаолиятида самарадорликни оширишда фаол иштирок этмоқда. Биз Ўзбекистонда аудит соҳасида кенг фаолият олиб бормоқдамиз. Шу жумладан, банк, консалтинг, IT консалтинг, иш самарадорлигини ошириш, стратегиялар ва рискларни бошқариш режаларини ишлаб чиқиш бўйича ишлаймиз.
Таъкидлаш керакки, чет эллик сармоядорларнинг Ўзбекистон банк тизимига қизиқиши ҳам ортиб бормоқда ва молия ташкилотлари улар томонидан татбиқ этилаётган технологиялардан фойдаланмоқда. Банк тизимининг янада ривожланиши учун, биринчидан, янги маҳсулотларнинг яратилишини жадаллаштиришимиз лозим. Иккинчидан, маълумотларни қайта ишлаш, алоқа каналлари, интернет каби инфратузилмаларни яхшилаш керак. Учинчидан, мувофиқлаштириш бўйича ислоҳотларни янги босқичга олиб чиқиш лозим», – деди мутахассис.
Марказий банк бошқарма бошлиғи ўринбосари Шоира Раҳимжонованинг таъкидлашича, айни пайтда Ўзбекистондаги банклар рақамли технологиялардан кенг фойдалана бошлаган.
«2021 йилда асосий қилинган янгилик масофавий биометрик идентификация. Бу механизм орқали мижозлар банк филиалларига ёки тўлов ташкилотларига бевосита ташриф буюрмаган ҳолда, масофавий тарзда банк тўлов хизматларидан фойдаланиш имкониятига эга бўлди. Мисол учун, улар банк ҳисоб-варағи ва электрон ҳамён очиши, ҳаттоки микрозайм олиши ва халқаро пул ўтказмалари орқали келиб тушган пул маблағларини масофавий тарзда тасарруф этиш имкониятига эга. Ҳозирги кунда 14 таижорат банки ва 3 та тўлов ташкилоти томонидан мазкур механизм тўлиқ ишга туширилиб, ундан кенг миқёсда фойдаланилмоқда. 25 та субъектда эса тўлов ва банк хизматларини кўрсатишда бу механизмнинг синов ишлари олиб борилмоқда. Мамлакатимизда чакана тўлов тизимларини ривожлантиришга ҳам катта эътибор қаратилмоқда. Айни пайтда Humo ва Uzcard тўлов тизимлари ўз хизматларини тақдим этяпти. Бугунги кунда мижозларимизда 30 миллион донадан ортиқ пластик карта мавжуд. Шундан 2 миллионтаси халқаро тўлов тизимларининг картаси, 1 миллионга яқин карталар эса кобейж карталар ҳисобланади», – деди Марказий банк ходими.
Изоҳ (0)