Ижтимоий тармоқларда Қашқадарё вилоятининг Ғузор туманида эшак сўйилгани хабар берилди. Ғузор тумани ҳокимлиги мазкур ҳолатга муносабат билдирди.
Аниқланишича, эшак сўйиш иши туманнинг «Эшонқудуқ» маҳалласи Абдуҳамид қишлоғидаги хонадонлардан бирида содир бўлган.
«Ғузор тумани ҳокими Бекзод Суюнов ‘Эшонқудуқ’ маҳалласи Абдуҳамид қишлоғида бўлиб, сектор раҳбарлари, мутасадди ташкилот раҳбарлари ва кенг жамоатчилик вакиллари иштирокида ҳолатни муҳокама қилди. Муҳокама давомида эшак сўйган хонадон эгаларининг, маҳалла фаоллари ва профилактика инспекторининг фикрларини эшитилди. Шундан сўнг, туман ҳокими, сектор раҳбарлари, мутасадди ташкилот раҳбарлари ва маҳалла фаоллари фуқаро Н.Р.нинг хонадонида бўлишди», — дейилади туман ҳокимлигининг расмий ахборотида.
Қайд этилишича, ҳоким эшак сўйилган хонадонга қўшни турувчи аҳволи вакиллари билан суҳбатлашиб, муаммо кўламини ўрганган.
«Бугунги кунда Ғузор туманида давлатимиз раҳбарининг ташаббуслари билан тарихий ўзгаришлар амалга оширилмоқда. Аммо содир бўлган бу ҳолат ғузорликларни обрўсига салбий таъсир кўрсатди, албатта бунга алоқадор ҳар бир шахсларга нисбатан қонунда белгиланган жазо қўлланилади», — деган туман ҳокими аҳоли билан суҳбати давомида.
Қўшимча қилинишича, ҳолат юзасидан ҳудудга масъул бўлган ички ишлар бўлими ходимлари, маҳалла фуқаролар йиғини раиси ва хотин-қизлар фаолига нисбатан хизмат текшируви тайинланган.
«Ўтказилган хизмат текширувлари натижасига кўра, мазкур ҳолат содир этилишига йўл қўйган мутасаддиларга нисбатан тегишли чоралар кўрилади», — дейилади хабарда.
Изоҳ (0)