Toshkent shahrida “Banklar va riteyl. Raqamli transformatsiya va o‘zaro hamkorlik” 2-xalqaro PLAS-forumi bo‘lib o‘tdi. Tadbirda 21 davlatdan 1 ming 200 nafar mutaxassis ishtirok etdi. “Daryo” muxbiri forum ishtirokchilaridan intervyu oldi.
KPMG kompaniyasining O‘zbekistondagi vakili, maslahat xizmati rahbari Farruh Abdullaxonov forumning ahamiyati haqida gapirdi.
“Forum ishtirokchilari O‘zbekiston bank tizimini yanada rivojlantirish vazifalari bilan bog‘liq xavflarni faol muhokama qildi. Shu bilan birga, forumda tijorat banklarini xususiylashtirish va raqamlashtirish, to‘lov tizimlarini rivojlantirish, yangi texnologiyalar samaradorligini oshirish masalalari haqida so‘z bordi. Aytishim mumkinki, bizning jamoa ham respublikadagi tijorat banklari faoliyatida samaradorlikni oshirishda faol ishtirok etmoqda. Biz O‘zbekistonda audit sohasida keng faoliyat olib bormoqdamiz. Shu jumladan, bank, konsalting, IT konsalting, ish samaradorligini oshirish, strategiyalar va risklarni boshqarish rejalarini ishlab chiqish bo‘yicha ishlaymiz.
Ta’kidlash kerakki, chet ellik sarmoyadorlarning O‘zbekiston bank tizimiga qiziqishi ham ortib bormoqda va moliya tashkilotlari ular tomonidan tatbiq etilayotgan texnologiyalardan foydalanmoqda. Bank tizimining yanada rivojlanishi uchun, birinchidan, yangi mahsulotlarning yaratilishini jadallashtirishimiz lozim. Ikkinchidan, ma’lumotlarni qayta ishlash, aloqa kanallari, internet kabi infratuzilmalarni yaxshilash kerak. Uchinchidan, muvofiqlashtirish bo‘yicha islohotlarni yangi bosqichga olib chiqish lozim”, – dedi mutaxassis.
Markaziy bank boshqarma boshlig‘i o‘rinbosari Shoira Rahimjonovaning ta’kidlashicha, ayni paytda O‘zbekistondagi banklar raqamli texnologiyalardan keng foydalana boshlagan.
“2021-yilda asosiy qilingan yangilik masofaviy biometrik identifikatsiya. Bu mexanizm orqali mijozlar bank filiallariga yoki to‘lov tashkilotlariga bevosita tashrif buyurmagan holda, masofaviy tarzda bank to‘lov xizmatlaridan foydalanish imkoniyatiga ega bo‘ldi. Misol uchun, ular bank hisob-varag‘i va elektron hamyon ochishi, hattoki mikrozaym olishi va xalqaro pul o‘tkazmalari orqali kelib tushgan pul mablag‘larini masofaviy tarzda tasarruf etish imkoniyatiga ega. Hozirgi kunda 14 taijorat banki va 3 ta to‘lov tashkiloti tomonidan mazkur mexanizm to‘liq ishga tushirilib, undan keng miqyosda foydalanilmoqda. 25 ta subyektda esa to‘lov va bank xizmatlarini ko‘rsatishda bu mexanizmning sinov ishlari olib borilmoqda. Mamlakatimizda chakana to‘lov tizimlarini rivojlantirishga ham katta e’tibor qaratilmoqda. Ayni paytda Humo va Uzcard to‘lov tizimlari o‘z xizmatlarini taqdim etyapti. Bugungi kunda mijozlarimizda 30 million donadan ortiq plastik karta mavjud. Shundan 2 milliontasi xalqaro to‘lov tizimlarining kartasi, 1 millionga yaqin kartalar esa kobeyj kartalar hisoblanadi”, – dedi Markaziy bank xodimi.
Izoh (0)