Наманганда 61-халқаро гуллар фестивали доирасида илк маротаба Фарғона водийси мода ҳафталиги бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Ушбу ҳафталик Фарғона водийси ёш дизайнерларининг халқаро танлови финал босқичи, тикувчилик корхоналари, дизайн-студиялар, реклама агентликлари вакиллари учун амалий семинар, мода маҳсулотларини интернет технологиялари ёрдамида илгари суриш бўйича тренинг ва профессионал дизайнерлар коллекциялари кўригини ўз ичига олди.
«Биз ушбу тажриба Фарғона водийси минтақалари — Ўзбекистонда Фарғона, Андижон ва Наманган, Қирғизистонда Баткен, Жалолобод ва Ўш, Тожикистонда Сўғд вилоятида истиқомат қилувчи ёш дизайнерлар истеъдодини юзага чиқариш, улар томонидан тайёрланаётган ижод намуналарига эътибор қаратиш учун ўзига хос имконият деб ҳисоблаймиз. Қолаверса, давлатлар ўртасида трансчегаравий ҳамкорликни йўлга қўйишнинг энг яхши намуналаридан бири», — дейди лойиҳа раҳбари Наталя Гарбуз.
Намангандаги модалар ҳафталигида Ўзбекистон, Қирғизистон ва Тожикистонда бўлиб ўтган ёш дизайнерлар танловларининг ғолиблари иштирок этди. Улар финал босқичида томошабинларга ўзлари тайёрлаган турфа услубдаги кийим-кечак намуналарини тақдим этди.
«Икки ҳафта давом этадиган халқаро гуллар фестивалининг ҳар бир кунини маданий, кўнгилочар тадбирлар билан бойитишни режалаштиргандик. Шу маънода Фарғона водийси мода ҳафталиги Наманганда ўтказилаётгани айни муддао бўлди. Биз бу ҳафталик анъанавий кўриниш олиши тарафдоримиз, ҳар йили фестивалимиз давомида мезбонлик қилишга тайёрмиз», — деди тадбирда иштирок этган вилоят ҳокими Шавкат Абдураззоқов.
Финал босқичида иштирокчиларга «Миллий либосларда этника ва замонавий мода» танловининг Ўзбекистон, Қирғизистон ва Тожикистон босқичлари ғолиби сифатида биринчи, иккинчи ва учинчи даражали дипломлар тақдим этилди. Қирғизистонлик ёш дизайнер Нурия Қашқарбоева эса Гран-при соҳибаси деб топилди.
Гала-шоуда Ўзбекистон, Қирғизистон, Тожикистон, Германия ва Россияда фаолият олиб бораётган профессионал дизайнерлар коллекциялари намойиши бўлиб ўтди. Томошабинлар этник услубда юксак маҳорат билан тайёрланган ранг-баранг либосларни кўриш ва баҳолаш имкониятига эга бўлди.
Ҳафталик якунида Олий Мажлис ҳузуридаги Жамоат фонди ҳамда USAID томонидан молиялаштирилган тадбир ташкилотчиси бўлган «Келажак бугундан бошланади» жамоат бирлашмаси Наманган вилояти бўлими ва «Ўзтўқимачиликсаноат» уюшмаси, Савдо-саноат палатаси, Наманган муҳандислик-технология институти, «Само» болалар ижодиёти академияси каби ҳамкор ташкилотларга мезбонлар томонидан миннатдорлик билдирилди.
Изоҳ (0)